മലപ്പുറം: ഉപതെരഞ്ഞെടുപ്പ് നടക്കുന്ന നിലമ്പൂരിൽ സ്ഥാനാർഥി പ്രഖ്യാപനം നീട്ടി പിവി അൻവർ. തൃണമൂൽ കോൺഗ്രസിനെ യുഡിഎഫ് ഘടകക്ഷിയാക്കിയില്ലെങ്കിൽ സ്ഥാനാർത്ഥിത്വം പ്രഖ്യാപിക്കുമെന്ന് നേരത്തെ പിവി അൻവറും നേതാക്കളും പറഞ്ഞിരുന്നു. എന്നാൽ, യുഡിഎഫ് തീരുമാനത്തിനായി ഒരു പകൽ കൂടി കാത്തിരിക്കുമെന്നും മാന്യമായ തീരുമാനം പ്രതീക്ഷിക്കുകയാണെന്നും പിവി അൻവർ വ്യക്തമാക്കി. പ്രഖ്യാപനം നടത്താൻ ഇന്ന് രാവിലെ ഒമ്പതിന് വിളിച്ച വാർത്താസമ്മേളനത്തിലാണ് തീരുമാനം തൽക്കാലത്തേക്ക് നീട്ടിയതായി പിവി അൻവർ അറിയിച്ചത്.
തന്നെ യുഡിഎഫിലെ ഉന്നത നേതാക്കൾ വിളിച്ച് ഒരു പകൽ കൂടി വെയിറ്റ് ചെയ്യണമെന്ന് ആവശ്യപ്പെട്ടു. സമൂഹത്തിലെ പ്രധാനപ്പെട്ട സാമുദായിക നേതാക്കളും യുഡിഎഫിൻറെ ഉത്തരവാദിത്വപ്പെട്ട നേതാക്കളും ചില സാമൂഹിക നേതാക്കളുമാണ് വിളിച്ചത്. അവരെല്ലാം ഒരു പകൽ കൂടി നിങ്ങൾ കാത്തിരിക്കണമെന്ന് ആവശ്യപ്പെട്ടത്. പികെ കുഞ്ഞാലിക്കുട്ടിയടക്കമുള്ള മുസ്ലീം ലീഗ് നേതാക്കളും കോൺഗ്രസിൻറെ ഉത്തരവാദിത്വപ്പെട്ട നേതാക്കളും ഇപ്പോൾ പ്രഖ്യാപനം നടത്തരുതെന്ന് പറഞ്ഞിരുന്നു.
അതിനാൽ എന്തിനാണോ ഇപ്പോ വാർത്താസമ്മേളനം വിളിച്ചത് അക്കാര്യം ഇപ്പോൾ ചർച്ച ചെയ്യുന്നില്ലെന്നും പിവി അൻവർ പറഞ്ഞു. ഇത്രയധികം ആളുകൾ കാത്തിരിക്കണമെന്ന് പറയുമ്പോൾ അത് മുഖവിലക്കെടുക്കാതിരിക്കാൻ കഴിയില്ല. അവർ പറഞ്ഞ കാര്യം മുഖവിലക്കെടുത്തുകൊണ്ട് പറയാൻ വിചാരിച്ച കാര്യങ്ങൾ തൽക്കാലം മാറ്റിവെക്കുകയാണ്. കൂടാതെ തൃണമൂൽ കോൺഗ്രസിൻറെ യോഗം ഇന്ന് രാവിലെ 11ന് ചേരുന്നുണ്ടെന്നും ഇക്കാര്യമൊക്കെ ചർച്ച ചെയ്യുമെന്നും പിവി അൻവർ പറഞ്ഞു. അതേസമയം അൻവർ വിഷയം ഉൾപ്പെടെ ചർച്ച ചെയ്യാൻ ഇന്ന് യുഡിഎഫ് യോഗവുമുണ്ട്.
