അമ്പലപ്പുഴ: അമ്മയുടെ അടുപ്പക്കാരനായ അയൽവാസിയെ ഷോക്കേൽപ്പിച്ച് കൊലപ്പെടുത്തിയ കേസിൽ മകനു പിന്നാലെ മാതാപിതാക്കളും അറസ്റ്റിൽ. പുന്നപ്ര വടക്ക് ഗ്രാമപ്പഞ്ചായത്ത് പതിനഞ്ചാം വർഡിൽ കണ്ണങ്കാട്ടുവെളിയിൽ ദിനേശ(53)നാണ് ഷോക്കേറ്റ് മരിച്ചത്. സംഭവവുമയി ബന്ധപ്പെട്ട് കൈതവളപ്പിൽ കുഞ്ഞുമോൻ(55), ഭാര്യ അശ്വമ്മ(50), മകൻ കിരൺ(29) എന്നിവരെയാണ് പുന്നപ്ര പോലീസ് അറസ്റ്റു ചെയ്തത്.
ശനിയാഴ്ച വൈകുന്നേരം 6.30-ഓടെയാണ് ദിനേശനെ വീടിന്റെ സമീപമുള്ള കരപ്പുരയിടത്തിൽ മരിച്ചനിലയിൽ കണ്ടെത്തിയത്. പോസ്റ്റുമോർട്ടത്തിൽ മരണകാരണം ഇലക്ട്രിക്ക് ഷോക്കാണെന്ന് കണ്ടെത്തി. പരിസരപ്രദേശങ്ങളിലെങ്ങും ഇലക്ട്രിക്ക് ഷോക്കേൽക്കുവാനുള്ള സാഹചര്യമില്ലാത്തത് സംശയത്തിനിടയാക്കി. ഇതോടെ അന്വേഷണം കിരണിലും വീട്ടുകാരിലും ചെന്നെത്തുകയായിരുന്നു.
അമ്മയുടെ ആൺസുഹൃത്തിനോടുള്ള പക, വീട്ടിലെത്തിയ അയൽവാസിയെ ഷോക്കടിപ്പിച്ച് കൊലപ്പെടുത്തി മൃതദേഹം പാടവരമ്പത്ത് ഉപേക്ഷിച്ചു, പിന്നെ ഒന്നുമറിയാത്ത രീതിയിൽ മകനെ വിളിച്ച് കാര്യങ്ങൾ തിരക്കി, മരണാനന്തര ചടങ്ങിലും മുൻപന്തിയിൽ, കിരണിന്റേത് ക്രിമിനൽ ബുദ്ധി, ഇലക്ട്രിക് ജോലികൾ നന്നായി അറിയാമെന്ന് നാട്ടുകാർ, കൊലപാതകം കിരണിന്റെ പിതാവിന്റെ അറിവോടെ
ദിനേശനെ അയൽവാസിയായ കുഞ്ഞുമോനും മകൻ കിരണും ചേർന്ന് അവരുടെ വീടിന് പുറകുവശത്ത് ദിനേശൻ എന്നും വരുന്ന വഴിയിൽ ഇലക്ട്രിക്ക് ഷോക്കേൽപിക്കുന്നതിനുള്ള കെണിയൊരുക്കുകയായിരുന്നു. വെള്ളിയാഴ്ച രാത്രി അശ്വമ്മയെ കാണാനായി കുഞ്ഞുമോന്റെ വീട്ടിലേക്ക് വന്ന ദിനേശൻ ഷോക്കേറ്റുവീണ് കൊല്ലപ്പെടുകയായിരുന്നുവെന്നും ദിനേശന്റെ മൃതദേഹം കുഞ്ഞുമോനും മകൻ കിരണും ചേർന്ന് പാടശേഖരത്തിൽ കൊണ്ടുപോയി ഇടുകയായിരുന്നുവെന്നും പോലീസ് കണ്ടെത്തി. ഇതേത്തുടർന്നാണ് മൂന്നുപേരേയും പോലീസ് അറസ്റ്റ് ചെയ്തത്.
