വയനാട്: മീനങ്ങാടി സ്കൂളിലെ വിനോദയാത്ര വിവാദത്തെത്തുടർന്ന് വിദ്യാർഥികളെ സമൂഹമാധ്യമങ്ങളിലൂടെ അധിക്ഷേപിച്ചവർക്കെതിരേ പോക്സോ കേസ്. മീനങ്ങാടി യുഡിഎഫ് നേതൃത്വം നൽകിയ പരാതിയിൽ സൈബർ പൊലീസാണ് കേസെടുത്തത്. ഐടി ആക്ട്, പോക്സോ നിയമം എന്നിവയ്ക്കു പുറമേ ഭാരതീയ ന്യായ സംഹിതയിലെ വകുപ്പുകളും ചുമത്തിയിട്ടുണ്ട്.
18 വയസ്സിൽ താഴെയുള്ള കുട്ടികളെ സമൂഹമാധ്യമങ്ങളിലൂടെ അധിക്ഷേപിച്ചതിനാണ് ബിഎൻഎസ് 79, ഐടി ആക്ട് 67 ബി, പോക്സോ ആക്ട് 11(i), 12 എന്നീ വകുപ്പുകൾ പ്രകാരം കേസെടുത്തത്. കുട്ടികൾക്കെതിരേ മോശം കമന്റുകൾ രേഖപ്പെടുത്തിയവരും അധിക്ഷേപകരമായ പോസ്റ്റുകൾ പങ്കുവെച്ചവരും നിയമനടപടി നേരിടേണ്ടിവരും.
അധിക്ഷേപ പരാമർശങ്ങൾ നടത്തിയ ഫെയ്സ്ബുക്ക് അക്കൗണ്ടുകൾ സൈബർ പൊലീസിന്റെ നിരീക്ഷണത്തിലാണ്.
കഴിഞ്ഞ ദിവസമാണ് മീനങ്ങാടി ഹയർ സെക്കൻഡറി സ്കൂൾ പ്രിൻസിപ്പലും പിടിഎ പ്രസിഡന്റും വിനോദയാത്രയ്ക്കിടെ ഹൈദരാബാദിലെ ബാർ റസ്റ്ററന്റിലേക്ക് പ്രവേശിക്കുന്നതിന്റെയും പുറത്തേക്ക് ഇറങ്ങിവരുന്നതിന്റെയും ദൃശ്യങ്ങൾ മീനങ്ങാടി യുഡിഎഫ് നേതൃത്വം പുറത്തുവിട്ടത്. ഈ ദൃശ്യങ്ങൾ സഹിതമാണ് പൊലീസിൽ പരാതി നൽകിയത്.
പ്രിൻസിപ്പൽ മദ്യപിച്ചെന്ന് തെളിയിക്കാനല്ല, വിനോദയാത്രയ്ക്കിടെ ബാർ റസ്റ്ററന്റിൽ പ്രവേശിച്ചെന്ന വിദ്യാർഥികളുടെ ആരോപണം ശരിയാണെന്ന് തെളിയിക്കാനാണ് ദൃശ്യങ്ങൾ പുറത്തുവിട്ടതെന്നായിരുന്നു യുഡിഎഫ് നേതൃത്വത്തിന്റെ വിശദീകരണം.
