തിരുവനന്തപുരം: കരമനയിൽ 55കാരനെ വീടിനുള്ളിൽ മരിച്ച നിലയിൽ കണ്ടെത്തിയ സംഭവം കൊലപാതകമെന്ന് തെളിഞ്ഞു. സംഭവത്തിൽ ഒപ്പം താമസിച്ചിരുന്ന കഴക്കൂട്ടം സ്വദേശി രൂപക് (35)നെ പൊലീസ് അറസ്റ്റ് ചെയ്തു. കരമന പള്ളിത്താനം സ്വദേശി ശ്രീകണ്ഠൻ നായരെയാണ് ബുധനാഴ്ച വീട്ടിനുള്ളിൽ മരിച്ച നിലയിൽ കണ്ടെത്തിയത്.
ബുധനാഴ്ച രാവിലെ രൂപക് തന്നെയാണ് ശ്രീകണ്ഠൻ നായരുടെ മരണവിവരം അയൽവാസികളെയും പൊലീസിനെയും അറിയിച്ചത്. തുടർന്ന് സ്ഥലത്തെത്തിയ പൊലീസ് ഇൻക്വസ്റ്റ് നടപടികൾ പൂർത്തിയാക്കി മൃതദേഹം പോസ്റ്റ്മോർട്ടത്തിനായി മാറ്റി. പോസ്റ്റ്മോർട്ടത്തിൽ ശ്രീകണ്ഠൻ നായരുടെ വാരിയെല്ലുകൾ പൊട്ടിയതായി കണ്ടെത്തിയതോടെയാണ് മരണത്തിൽ ദുരൂഹതയുണ്ടെന്ന നിഗമനത്തിൽ പൊലീസ് എത്തിയത്.
തുടർന്ന് നടത്തിയ അന്വേഷണത്തിൽ ശ്രീകണ്ഠൻ നായർക്കൊപ്പം താമസിച്ചിരുന്ന രൂപകിനെ കാണാനില്ലെന്ന് പൊലീസ് കണ്ടെത്തി. തുടർന്ന് നടത്തിയ തിരച്ചിലിലാണ് കിഴക്കേകോട്ട ഭാഗത്തുനിന്ന് രൂപകിനെ പൊലീസ് കസ്റ്റഡിയിലെടുത്തത്.
ഒന്നര മാസമായി രൂപക് ശ്രീകണ്ഠൻ നായരുടെ വീട്ടിലാണ് താമസിച്ചിരുന്നത്. രൂപക് വാങ്ങിവെച്ചിരുന്ന മദ്യം ശ്രീകണ്ഠൻ നായർ കഴിച്ചതിനെ തുടർന്നാണ് ഇരുവരും തമ്മിൽ തർക്കമുണ്ടായതെന്നാണ് പൊലീസിന്റെ കണ്ടെത്തൽ. മദ്യപിക്കുന്നതിനിടെ ഉണ്ടായ വാക്കേറ്റം പിന്നീട് സംഘർഷത്തിലേക്ക് നീങ്ങുകയും കൊലപാതകത്തിൽ കലാശിക്കുകയുമായിരുന്നുവെന്ന് പൊലീസ് അറിയിച്ചു.
കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
