കിഴക്കമ്പലം: സ്വന്തം ഉടമസ്ഥതയിലല്ലാത്ത കാർ വിൽപ്പനയ്ക്കെന്ന പേരിൽ ഒഎൽഎക്സിൽ പരസ്യം നൽകി പണം തട്ടിയെന്ന പരാതിയിൽ ഒരാൾക്കെതിരെ പൊലീസ് കേസെടുത്തു. ഡബിൾ പാലം സ്വദേശി അഫ്സൽ നൽകിയ പരാതിയിലാണ് ഷാഹിൻ സഫീറിനെതിരെ പൊലീസ് നടപടി.
കെ.എൽ. 53 യു 3373 നമ്പറിലുള്ള കാർ വിൽപ്പനയ്ക്കുണ്ടെന്ന് കാണിച്ചാണ് പ്രതി ഒഎൽഎക്സിൽ പരസ്യം നൽകിയതെന്നാണ് പരാതിയിൽ പറയുന്നത്. പരസ്യം കണ്ട് കാർ വാങ്ങാൻ താൽപര്യപ്പെട്ട പരാതിക്കാരനിൽനിന്ന് വിവിധ ഘട്ടങ്ങളിലായി 3,34,000 രൂപ പ്രതി കൈപ്പറ്റിയെന്നും പരാതിയിൽ പറയുന്നു.
എന്നാൽ പിന്നീട് മറ്റൊരാളുടെ ഉടമസ്ഥതയിലുള്ള കാറാണ് പരാതിക്കാരന് നൽകാൻ ശ്രമിച്ചത്. ഇതോടെയാണ് തട്ടിപ്പ് നടന്നതായി പരാതിക്കാരന് ബോധ്യപ്പെട്ടത്. തുടർന്ന് നൽകിയ പരാതിയിൽ നടത്തിയ പരിശോധനയ്ക്കുശേഷമാണ് പൊലീസ് കേസ് രജിസ്റ്റർ ചെയ്തത്.
