ന്യൂഡൽഹി: ഒരു സർക്കാർ ഉദ്യോഗസ്ഥൻ അറസ്റ്റിലായി 48 മണിക്കൂറിലധികം ജുഡീഷ്യൽ കസ്റ്റഡിയിൽ കഴിയുകയാണെങ്കിൽ നിയമപ്രകാരം സ്വമേധയാ സസ്പെൻഷനിലായതായി കണക്കാക്കുമെന്ന് സുപ്രീംകോടതി. ഇതിനായി പ്രത്യേക സസ്പെൻഷൻ ഉത്തരവ് പുറപ്പെടുവിക്കേണ്ടതില്ലെന്നും കോടതി വ്യക്തമാക്കി.
ബിഹാറിലെ സമസ്തിപൂർ സദർ ആശുപത്രി അഡ്മിനിസ്ട്രേറ്ററായ വിശ്വജീത് സിങ്ങിന് അനുവദിച്ച ജാമ്യം പുനഃസ്ഥാപിച്ചുകൊണ്ടുള്ള ഉത്തരവിലാണ് ജസ്റ്റിസുമാരായ ജെ.ബി. പർദിവാല, മന്മോഹൻ എന്നിവരടങ്ങിയ ബെഞ്ചിന്റെ സുപ്രധാന നിരീക്ഷണം. അഴിമതിക്കേസിൽ അറസ്റ്റിലായ വിശ്വജീത് സിങ് ഏകദേശം 15 ദിവസത്തോളം ജുഡീഷ്യൽ കസ്റ്റഡിയിൽ കഴിഞ്ഞിരുന്നു.
കരാർ അടിസ്ഥാനത്തിൽ ജോലി ചെയ്തിരുന്ന ഒരു ജീവനക്കാരന്റെ കുടിശ്ശികയായ 36,421 രൂപയുടെ ശമ്പളം അനുവദിച്ചുനൽകാൻ 4,000 രൂപ കൈക്കൂലി ആവശ്യപ്പെട്ടെന്നായിരുന്നു വിശ്വജീത് സിങ്ങിനെതിരായ ആരോപണം. സംഭവത്തിൽ 2025ൽ വിജിലൻസ് പോലീസ് സ്റ്റേഷനിൽ അഴിമതി നിരോധന നിയമത്തിലെ 7(ബി) വകുപ്പ് പ്രകാരം എഫ്ഐആർ രജിസ്റ്റർ ചെയ്തിരുന്നു.
അറസ്റ്റിനെത്തുടർന്ന് സെഷൻസ് കോടതി വിശ്വജീത് സിങ്ങിന് ജാമ്യം അനുവദിച്ചു. എന്നാൽ പരാതിക്കാരൻ ജാമ്യത്തിനെതിരെ പട്ന ഹൈക്കോടതിയെ സമീപിച്ചു. തുടർന്ന് 2026 ജൂലൈ ഒന്നിന് ഹൈക്കോടതി ജാമ്യം റദ്ദാക്കുകയും പ്രതിയെ വീണ്ടും കസ്റ്റഡിയിലെടുക്കാൻ ഉത്തരവിടുകയും ചെയ്തു. ജാമ്യം അനുവദിച്ച് ഏകദേശം ഒരു വർഷത്തിന് ശേഷമായിരുന്നു ഹൈക്കോടതിയുടെ നടപടി.
ഹൈക്കോടതി ഉത്തരവിനെതിരെ വിശ്വജീത് സിങ് സുപ്രീംകോടതിയെ സമീപിക്കുകയായിരുന്നു. കൈക്കൂലി ആവശ്യപ്പെട്ട തുക കുറവാണെന്ന സെഷൻസ് കോടതിയുടെ നിരീക്ഷണം ജാമ്യം അനുവദിക്കുന്നതിൽ നിർണായകമായെന്ന് ഹൈക്കോടതി കരുതിയതായി സുപ്രീംകോടതി വിലയിരുത്തി. കൈക്കൂലിയുടെ തുക ജാമ്യാപേക്ഷ പരിഗണിക്കുമ്പോൾ പ്രസക്തമായ ഘടകമല്ലെങ്കിലും അക്കാര്യം ചൂണ്ടിക്കാട്ടിയതിന്റെ പേരിൽ മാത്രം ജാമ്യം റദ്ദാക്കേണ്ടതില്ലെന്നും ബെഞ്ച് നിരീക്ഷിച്ചു.
വിചാരണക്കോടതി കുറ്റക്കാരനാണെന്ന് കണ്ടെത്തിയാൽ പരമാവധി ലഭിക്കാവുന്ന ശിക്ഷയുടെ സ്വഭാവം പരിഗണിക്കുമ്പോൾ ഇത്തരം കേസുകളിൽ സാധാരണയായി ജാമ്യം അനുവദിക്കേണ്ടതാണെന്നും സുപ്രീംകോടതി പറഞ്ഞു. എന്നാൽ ക്രിമിനൽ പശ്ചാത്തലമുള്ള പ്രതികൾക്കും അതീവ ഗുരുതരമായ വസ്തുതകൾ ഉൾപ്പെടുന്ന കേസുകളിലും ജാമ്യം നിഷേധിക്കാമെന്നും കോടതി വ്യക്തമാക്കി.
നവംബർ ആറിന് പുറപ്പെടുവിച്ച ഉത്തരവിൽ മറ്റൊരു ഗൗരവകരമായ വിഷയം കൂടി സുപ്രീംകോടതി ചൂണ്ടിക്കാട്ടി. അറസ്റ്റിലായതിന് പിന്നാലെ വിശ്വജീത് സിങ് ഏകദേശം 15 ദിവസം ജുഡീഷ്യൽ കസ്റ്റഡിയിൽ കഴിഞ്ഞിരുന്നു. ഒരു സർക്കാർ ഉദ്യോഗസ്ഥൻ അറസ്റ്റിലായി 48 മണിക്കൂറിലധികം ജുഡീഷ്യൽ കസ്റ്റഡിയിൽ കഴിയുന്ന സാഹചര്യത്തിൽ നിയമപ്രകാരം സ്വമേധയാ സസ്പെൻഷൻ നിലവിൽ വരും. ഇതിനായി പ്രത്യേക ഉത്തരവ് ആവശ്യമില്ലെന്ന് ജസ്റ്റിസ് പർദിവാല വ്യക്തമാക്കി.
വിശ്വജീത് സിങ്ങിനെ ആദ്യം സസ്പെൻഡ് ചെയ്തിരുന്നുവെന്നും പിന്നീട് സസ്പെൻഷൻ ഉത്തരവ് പിൻവലിച്ചുവെന്നും സുപ്രീംകോടതി ചൂണ്ടിക്കാട്ടി. എന്നാൽ അതിനുശേഷം വീണ്ടും അതേ ആശുപത്രിയിൽ അതേ തസ്തികയിൽ തന്നെ നിയമിച്ചതാണ് കോടതിയെ ഞെട്ടിച്ചത്.
“ഇത് അവഗണിക്കാനാകാത്ത ഗൗരവകരമായ വിഷയമാണ്. സസ്പെൻഷൻ പിൻവലിച്ചശേഷം പ്രതിയെ വീണ്ടും അതേ ആശുപത്രിയിൽ അതേ തസ്തികയിൽ നിയമിച്ചിരിക്കുകയാണ്. ഇക്കാര്യം സംസ്ഥാന സർക്കാർ എത്രയും വേഗം പരിശോധിക്കണം. നിയമപ്രകാരം ആവശ്യമായ നടപടികൾ സ്വീകരിക്കുമെന്ന് പ്രതീക്ഷിക്കുന്നു,” ബെഞ്ച് വ്യക്തമാക്കി.
ഹൈക്കോടതി റദ്ദാക്കിയ ജാമ്യം പുനഃസ്ഥാപിച്ച സുപ്രീംകോടതി, സർക്കാർ ഉദ്യോഗസ്ഥന്റെ സസ്പെൻഷനും പുനർനിയമനവും സംബന്ധിച്ച വിഷയത്തിൽ സംസ്ഥാന സർക്കാർ നിയമാനുസൃത നടപടി സ്വീകരിക്കണമെന്നും നിർദേശിച്ചു.
