ധാക്ക: ഷെയ്ഖ് ഹസീനയുടെ പുതിയ പാസ്‌പോർട്ട് അപേക്ഷ നിരസിച്ച് ബംഗ്ലാദേശ് സർക്കാർ. ഹസീനയുടെ അപേക്ഷ വെറും ‘നാടകം’ മാത്രമാണെന്ന് വിശേഷിപ്പിച്ച സർക്കാർ, തീവ്രവാദികൾക്ക് പാസ്‌പോർട്ട് അനുവദിക്കില്ലെന്നും വ്യക്തമാക്കി. ഇതിനിടെ, ഇന്ത്യയും ബംഗ്ലാദേശും തമ്മിലുള്ള കുറ്റവാളികളെ കൈമാറാനുള്ള കരാർ പ്രകാരം ഹസീനയെ കൈമാറണമെന്ന് ഇന്ത്യയോട് ആവശ്യപ്പെടുകയും ചെയ്തു.
ലണ്ടൻ ആസ്ഥാനമായി പ്രവർത്തിക്കുന്ന നിയമസ്ഥാപനം വഴിയാണ് ഡൽഹിയിലെ ബംഗ്ലാദേശ് ഹൈക്കമ്മീഷനിൽ ഹസീന പുതിയ പാസ്‌പോർട്ടിനും ദേശീയ തിരിച്ചറിയൽ കാർഡിനും അപേക്ഷ നൽകിയത്. അന്താരാഷ്ട്ര മനുഷ്യാവകാശ തത്ത്വങ്ങളും ബംഗ്ലാദേശ് പൗരത്വവും പരിഗണിച്ച് എത്രയും വേഗം പുതിയ പാസ്‌പോർട്ടും തിരിച്ചറിയൽ കാർഡും അനുവദിക്കണമെന്നാണ് അഭിഭാഷകർ ആവശ്യപ്പെട്ടത്. 2024-ൽ മുഹമ്മദ് യൂനുസിന്റെ നേതൃത്വത്തിലുള്ള ഇടക്കാല സർക്കാർ ഹസീനയുടെ പാസ്‌പോർട്ടും തിരിച്ചറിയൽ കാർഡും റദ്ദാക്കിയിരുന്നു.
ഡൽഹിയിലെ ബംഗ്ലാദേശ് ഹൈക്കമ്മീഷൻ അപേക്ഷ വിദേശകാര്യ മന്ത്രാലയത്തിന് കൈമാറി. എന്നാൽ, നിയമസ്ഥാപനം അയച്ച ഇമെയിലിനൊപ്പം ഹസീനയുടെ അനുമതിപത്രമോ ഔദ്യോഗിക രേഖകളോ ഉണ്ടായിരുന്നില്ലെന്നാണ് ബംഗ്ലാദേശ് സർക്കാർ വൃത്തങ്ങളെ ഉദ്ധരിച്ച് പ്രാദേശിക മാധ്യമങ്ങൾ റിപ്പോർട്ട് ചെയ്തത്. അതിനാൽ അപേക്ഷ ഹസീനയുടെ അറിവോടെയും അനുമതിയോടെയുമാണോ സമർപ്പിച്ചതെന്ന് ഉറപ്പിക്കാനായിട്ടില്ലെന്നും റിപ്പോർട്ടിൽ പറയുന്നു.
അതേസമയം, ഹസീന രാജ്യത്തുനിന്ന് പലായനം ചെയ്തതാണെന്നും പുതിയ പാസ്‌പോർട്ടുമായി തിരിച്ചെത്താനുള്ള നാടകത്തിന് പ്രസക്തിയില്ലെന്നും ബംഗ്ലാദേശ് വിദേശകാര്യ സഹമന്ത്രി ഹുമയൂൺ കബീർ പ്രതികരിച്ചു. രാജ്യത്തേക്ക് മടങ്ങാൻ ആത്മാർഥമായി ആഗ്രഹിക്കുന്നുണ്ടെങ്കിൽ അതിന് കൃത്യമായ നിയമവഴിയുണ്ടെന്നും അദ്ദേഹം പറഞ്ഞു.
ഇന്ത്യയും ബംഗ്ലാദേശും തമ്മിൽ കുറ്റവാളികളെ കൈമാറുന്നതിനുള്ള കരാറുണ്ട്. ഇതുപ്രകാരം ഹസീനയെ ബംഗ്ലാദേശിന് കൈമാറാൻ ഇന്ത്യയോട് ആവശ്യപ്പെടുകയാണ് വേണ്ടത്. രാജ്യത്ത് തിരിച്ചെത്തിയാൽ കോടതിയിൽ കീഴടങ്ങി ശിക്ഷ അനുഭവിക്കാമെന്നും കബീർ വ്യക്തമാക്കി.
2024 ഓഗസ്റ്റിൽ നടന്ന സർക്കാർ വിരുദ്ധ പ്രക്ഷോഭത്തെത്തുടർന്നാണ് ഷെയ്ഖ് ഹസീനയ്ക്ക് പ്രധാനമന്ത്രി സ്ഥാനം ഒഴിഞ്ഞ് ഇന്ത്യയിലേക്ക് പലായനം ചെയ്യേണ്ടിവന്നത്. പ്രതിഷേധക്കാർ ധാക്കയിലെ പ്രധാനമന്ത്രിയുടെ ഔദ്യോഗിക വസതിയിലേക്ക് ഇരച്ചുകയറിയതോടെയായിരുന്നു അധികാരമാറ്റം.
കഴിഞ്ഞ രണ്ടുവർഷമായി ഇന്ത്യയിൽ കഴിയുന്ന ഹസീനയ്‌ക്കെതിരെ ബംഗ്ലാദേശിലെ പ്രത്യേക ട്രിബ്യൂണൽ അവരുടെ അസാന്നിധ്യത്തിൽ വിചാരണ നടത്തി വധശിക്ഷ വിധിച്ചിരുന്നു. 2024-ലെ പ്രക്ഷോഭത്തിനിടെ നൂറുകണക്കിന് ആളുകൾ കൊല്ലപ്പെടാനും ആയിരങ്ങൾക്ക് പരിക്കേൽക്കാനും ഇടയാക്കിയ നടപടികൾക്ക് ഉത്തരവിട്ടത് ഹസീനയാണെന്ന കണ്ടെത്തലിന്റെ അടിസ്ഥാനത്തിലായിരുന്നു ശിക്ഷ.
