തിരുവനന്തപുരം: പുതിയ എംഎൽഎമാരായി സത്യപ്രതിജ്ഞ ചെയ്ത രാഹുൽ മാങ്കൂട്ടത്തിലിനും യുആർ പ്രദീപിനും സ്പീക്കർ ഉപഹാരമായി നൽകിയത് നീല ട്രോളി ബാഗ്. നിയമസഭ ചട്ടങ്ങളും മറ്റ് അനുബന്ധ സാമഗ്രികളും അടങ്ങുന്നതാണ് ഈ നീല ട്രോളി ബാഗ്. ഇതോടെ രാഹുലിനെ ട്രോളിക്കൊണ്ടു നൽകിയതാണോയിതെന്ന സംശയത്തിലാണ് പ്രതിപക്ഷവും ഭരണപക്ഷവും. എന്നാൽ നീല ട്രോളി ബാഗ് നൽകിയത് തികച്ചും യാദൃശ്ചികം മാത്രമാണെന്ന് നിയമസഭ സെക്രട്ടറിയേറ്റിന്റെ വിശദീകരണം.
മുൻപും എംഎൽഎമാർക്ക് ഇത്തരം ഉപഹാരങ്ങൾ നൽകാറുണ്ടെന്നാണ് നിയമസഭ സെക്രട്ടറിയ് നൽകിയ വിശദീകരണം. മുൻപേ വാങ്ങിവച്ച ബാഗുകളാണ് ഇരുവർക്കും നൽകിയത്. വിവാദങ്ങളുമായി ഇതിന് ബന്ധമില്ലെന്ന് നിയമസഭാ സെക്രട്ടറിയേറ്റ് അറിയിച്ചു.
പാലക്കാട് ഉപതിരഞ്ഞെടുപ്പിൽ ഏറെ ചർച്ചയായിരുന്നു നീല ട്രോളിബാഗ് വിവാദം. ട്രോളി ബാഗിൽ കള്ളപ്പണം എത്തിച്ചുവെന്ന സിപിഎം നേതാക്കളുടെ പരാതിയിൽ രാഹുൽ മാങ്കൂട്ടത്തിലും മറ്റ് പ്രവർത്തകരും താമസിച്ചിരുന്ന ഹോട്ടലിൽ പോലീസ് പരിശോധന നടത്തിയിരുന്നു. എന്നാൽ ആരോപണവുമായി ബന്ധപ്പെട്ട തെളിവുകളൊന്നും ലഭിച്ചില്ല. പിന്നീട് യാത്രയിൽ ഉപയോഗിച്ച നീല ട്രോളി ബാഗുമായി രാഹുൽ മാങ്കൂട്ടത്തിൽ രംഗത്തെത്തിയതോടെ ട്രോളി ബാഗ് വലിയൊരു രാഷ്ട്രീയ വിവാദമായി മാറി. എന്നാൽ തെളിവില്ലാത്തതിനെ തുടർന്ന് ഈ കേസ് പോലീസ് അവസാനിപ്പിക്കുകയും ചെയ്തു.
സെക്രട്ടറിയേറ്റ് വിശദീകരണം നൽകിയെങ്കിലും തിരഞ്ഞെടുപ്പിൽ വിജയിച്ചു കയറിയ രാഹൂൽ മാങ്കൂട്ടത്തിലിനും യുആർ പ്രദീപിനും നീല ട്രോളി ബാഗ് നൽകിയത് ഒരു ‘ട്രോൾ’ ആണെന്ന രീതിയിൽ ചർച്ചയാവുകയാണിപ്പോൾ.
