വടകര: വടകരയിലെ എംഡിഎംഎ കേസിൽ പ്രധാന പ്രതികളിലൊരാളായ പേരാമ്പ്ര മേഞ്ഞാണ്യം കാരേപ്പൊയിൽ സ്വദേശി ഫിറോസിനെ (28) പൊലീസ് പിടികൂടി. കേസിൽ നേരത്തെ പിടിയിലായ അനസിന്റെ അടുത്ത കൂട്ടാളിയും കർണാടക ജയിലിൽ കഴിയുന്ന ചങ്ങരോത്ത് പുറവൂർ സ്വദേശി പൊൻ അജ്മലിന്റെ അടുത്ത സഹപ്രവർത്തകനുമാണ് ഫിറോസെന്ന് പൊലീസ് വ്യക്തമാക്കി.
മലബാറിലെ എംഡിഎംഎ മൊത്തവിതരണവുമായി ബന്ധപ്പെട്ട ഇടപാടുകൾ നിയന്ത്രിച്ചിരുന്നത് ഫിറോസാണെന്നാണ് പൊലീസിന്റെ കണ്ടെത്തൽ. കേസിൽ അധ്യാപികമാരെ ഉൾപ്പെടുത്തിയതിലും സാമ്പത്തിക ഇടപാടുകൾ നിയന്ത്രിച്ചതിലും ഇയാൾക്ക് പങ്കുണ്ടെന്നാണ് ആരോപണം. കേസിലെ മറ്റൊരു പ്രധാന പ്രതിയായ വയനാട് സ്വദേശി ഷിന്റോ ഷിജുവുമായി നേരിട്ട് ഇടപാടുകൾ നടത്തിയിരുന്നതും ഫിറോസാണെന്ന് പൊലീസ് പറയുന്നു.
മുമ്പ് മൊടക്കല്ലൂരിലെ ലോഡ്ജിൽനിന്ന് യുവതിക്കൊപ്പം എംഡിഎംഎയുമായി ഫിറോസിനെ എക്സൈസ് സംഘം പിടികൂടിയിരുന്നു. ഈ കേസിൽ ജയിലിലായിരുന്ന ഇയാൾ ജാമ്യത്തിലിറങ്ങിയശേഷം വീണ്ടും ലഹരിമരുന്ന് ഇടപാടുകൾ നടത്തുന്നതിനിടെയാണ് പിടിയിലായതെന്നാണ് വിവരം.
റൂറൽ എസ്‌പിയുടെ ഡാൻസാഫ് സംഘം ഫിറോസിനെ നിരീക്ഷിച്ചുവരികയായിരുന്നു. പേരാമ്പ്ര ചെമ്പ്ര റോഡിൽ ഇയാൾ എത്തിയെന്ന വിവരം ലഭിച്ചതിനെത്തുടർന്ന് സംഘം പിടികൂടി. പേരാമ്പ്ര പൊലീസ് ഇൻസ്പെക്ടർ കെ.എം. അനിൽകുമാറിന്റെ നേതൃത്വത്തിലുള്ള പൊലീസ് സംഘം സ്ഥലത്തെത്തി പ്രതിയെ വടകര പൊലീസിന് കൈമാറി.
