വാഷിങ്ടൺ: റഷ്യൻ എണ്ണ വാങ്ങുന്ന രാജ്യങ്ങൾക്കുമേൽ കടുത്ത തീരുവകളും ഉപരോധങ്ങളും ഏർപ്പെടുത്താനുള്ള നീക്കത്തിൽ താൽക്കാലിക ഇളവ് പ്രഖ്യാപിച്ച് അമേരിക്കൻ പ്രസിഡന്റ് ഡൊണാൾഡ് ട്രംപ്. ഇന്ത്യയുൾപ്പെടെയുള്ള രാജ്യങ്ങൾക്ക് വലിയ സാമ്പത്തിക തിരിച്ചടിയാകുമായിരുന്ന നിയന്ത്രണങ്ങൾ നടപ്പാക്കുന്നതിന് തൊട്ടുമുമ്പാണ് ട്രംപിന്റെ നിർണായക നീക്കം. ഇതുസംബന്ധിച്ച് അമേരിക്ക പുതിയ എക്സിക്യൂട്ടീവ് ഉത്തരവും പുറത്തിറക്കി.
ദേശീയ താൽപ്പര്യങ്ങൾ മുൻനിർത്തിയാണ് ഗ്രഹാം ആക്ടിലെ വ്യവസ്ഥകളിൽ നിന്ന് താൽക്കാലിക ഇളവ് അനുവദിക്കുന്നതെന്ന് വെള്ളിയാഴ്ച രാത്രി പുറത്തിറക്കിയ ഉത്തരവിൽ ട്രംപ് വ്യക്തമാക്കി. ഇതുസംബന്ധിച്ച സാക്ഷ്യപത്രം യുഎസ് കോൺഗ്രസിന് സമർപ്പിച്ചതായും അദ്ദേഹം അറിയിച്ചു. അതേസമയം, ഉപരോധങ്ങൾ പൂർണമായി റദ്ദാക്കിയിട്ടില്ല. അവയുടെ നടപ്പാക്കൽ താൽക്കാലികമായി നിർത്തിവെച്ചതിനാൽ, സാഹചര്യം മാറിയാൽ ഭാവിയിൽ നിയന്ത്രണങ്ങൾ വീണ്ടും കൊണ്ടുവരാനും ട്രംപിന് കഴിയും.
റഷ്യയിൽനിന്ന് വൻതോതിൽ ക്രൂഡ് ഓയിൽ വാങ്ങുന്ന രാജ്യങ്ങളെ ലക്ഷ്യമിട്ട് കടുത്ത നടപടികൾ സ്വീകരിക്കാനായിരുന്നു നിയമത്തിലെ വ്യവസ്ഥകൾ. ഇന്ത്യ, ചൈന, സ്ലൊവാക്യ, ഹംഗറി, അസർബൈജാൻ തുടങ്ങിയ രാജ്യങ്ങളിൽനിന്നുള്ള ഉൽപ്പന്നങ്ങൾക്ക് 100 ശതമാനം വരെ തീരുവ ചുമത്താനും റഷ്യൻ ഊർജ ഉൽപ്പന്നങ്ങളുടെ അമേരിക്കൻ ഇറക്കുമതിക്ക് 500 ശതമാനം വരെ തീരുവ ഏർപ്പെടുത്താനും നിയമം അധികാരം നൽകിയിരുന്നു. ഒക്ടോബർ 18-ന് അവസാനിക്കാനിരുന്ന ഒരു മാസത്തെ സമയപരിധിക്ക് തൊട്ടുമുമ്പാണ് ഇളവ് പ്രഖ്യാപിച്ചത്.
റഷ്യയുടെ യുദ്ധത്തിനുള്ള സാമ്പത്തിക സ്രോതസ്സുകൾ തടയുക, ബാങ്കിങ് മേഖലയെയും ഊർജ മേഖലയെയും സമ്മർദത്തിലാക്കുക എന്നിവയായിരുന്നു നിയമത്തിന്റെ പ്രധാന ലക്ഷ്യങ്ങൾ. ഇന്ത്യയ്ക്കെതിരെ 100 ശതമാനം അധിക തീരുവ ചുമത്തിയിരുന്നെങ്കിൽ, നിലവിലുള്ള 10 ശതമാനം തീരുവയ്ക്കു പുറമെ അത് രാജ്യത്തിന് വലിയ സാമ്പത്തിക ബാധ്യത സൃഷ്ടിക്കുമായിരുന്നു.
അതേസമയം, രാജ്യത്തെ 140 കോടി ജനങ്ങളുടെ ഊർജസുരക്ഷ ഉറപ്പാക്കുന്നതിനായി വിപണി സാഹചര്യങ്ങൾക്കനുസരിച്ച് ക്രൂഡ് ഓയിൽ ഇറക്കുമതി സ്രോതസ്സുകൾ വൈവിധ്യവത്കരിക്കാനാണ് ഇന്ത്യയുടെ തീരുമാനമെന്ന് വിദേശകാര്യ മന്ത്രാലയം വ്യക്തമാക്കിയിട്ടുണ്ട്. അമേരിക്കൻ ഉദ്യോഗസ്ഥരുമായി നടത്തിയ ചർച്ചകളിൽ ഉഭയകക്ഷി ബന്ധത്തിലും ആഗോള ഊർജ വിപണിയിലും ഉണ്ടാകാവുന്ന പ്രത്യാഘാതങ്ങൾ ഇന്ത്യ ചൂണ്ടിക്കാട്ടിയതായും മന്ത്രാലയം അറിയിച്ചു.
യുക്രെയ്ൻ പ്രസിഡന്റ് വൊളോഡിമിർ സെലെൻസ്കിയുമായുള്ള അഭിപ്രായവ്യത്യാസങ്ങളും റഷ്യൻ പ്രസിഡന്റ് വ്ലാഡിമിർ പുതിനുമായുള്ള ബന്ധം മെച്ചപ്പെടുത്താനുള്ള ട്രംപിന്റെ നീക്കങ്ങളും ചർച്ചയാകുന്നതിനിടെയാണ് പുതിയ തീരുമാനം. അമേരിക്കയിലേക്ക് മൂന്ന് ലക്ഷം ടണ്ണിലധികം റഷ്യൻ ഡീസൽ ഇറക്കുമതി ചെയ്യുന്നതുമായി ബന്ധപ്പെട്ട് പുതിനുമായി ട്രംപ് കഴിഞ്ഞ ആഴ്ച കരാറിലെത്തിയിരുന്നുവെന്നാണ് റിപ്പോർട്ട്. ഈ നീക്കത്തെ സെലെൻസ്കി രൂക്ഷമായി വിമർശിക്കുകയും ചെയ്തു.
യുദ്ധം അവസാനിപ്പിക്കാൻ കരാറിലെത്താൻ കഴിയാത്ത സാഹചര്യത്തിൽ യുക്രെയ്ൻ പുതിയൊരു നേതാവിനെ കണ്ടെത്തണമെന്ന നിലപാടും ട്രംപ് പരസ്യമായി ഉന്നയിച്ചിരുന്നു. റഷ്യയുമായുള്ള ബന്ധത്തിലും യുക്രെയ്ൻ യുദ്ധവുമായി ബന്ധപ്പെട്ട അമേരിക്കൻ നയത്തിലും നിർണായകമായ മാറ്റങ്ങൾ ചർച്ചയാകുന്ന പശ്ചാത്തലത്തിലാണ് പുതിയ തീരുവ ഇളവ് ശ്രദ്ധ നേടുന്നത്.
