തൃശൂർ: തൃശൂരിൽ പോലീസ് വാഹനം യുവാക്കളെ ഇടിച്ച സംഭവം കൊലപ്പെടുത്തുകയെന്ന ഉദ്ദേശത്തോടെയെന്ന ആരോപണവുമായി പരുക്കേറ്റ യുവാവിൻറെ കുടുംബം. സംഭവത്തിൽ നാലുപേരെ സസ്പെൻഡ് ചെയ്തു. പി. മഹേഷ് (എസ്എച്ച്ഒ) ഫൈസൽ, യദുകൃഷ്ണ, നവീൻകുമാർ എന്നിവർക്ക് സസ്പെൻഷൻ. ബോധപൂർവ്വം ഇടിപ്പിക്കുകയായിരുന്നുവെന്ന് വ്യക്തമാക്കുന്ന മൊബൈൽ ഫോൺ റെക്കോർഡിംഗ് ദൃശ്യങ്ങൾ പരുക്കേറ്റ അമലിന്റെ മാതാവ് പ്രസന്ന ഷാജു പുറത്തുവിട്ടു.
സംഭവ സമയം പോലീസ് പിടിച്ചെടുത്ത അമലിന്റെ ഐഫോണിൽ ഓട്ടോ റെക്കോർഡ് ആയ വീഡിയോയാണ് പുറത്തുവിട്ടത്. വാഹനം കുറച്ചുകൂടി വേഗത കൂട്ടിയിരുന്നുവെങ്കിൽ യുവാക്കൾ ചത്തേനെയെന്ന് വീഡിയോയിൽ സംസാരിക്കുന്ന ആൾ പറയുന്നത് വീഡിയോയിൽ വ്യക്തമായി കേൾക്കാം. ജീവിതത്തിൽ ഒരിക്കലും ഇനി ഇത് മറക്കില്ല എന്നും വീഡിയോയിൽ പറയുന്നു.
അതേസമയം സംഭവത്തിൽ കുടുംബം ഐജി പി. വിജയന് പരാതി നൽകിയിട്ടുണ്ട്. പരുക്കേറ്റ യുവാക്കളെ ആശുപത്രിയിൽ എത്തിച്ചില്ലെന്ന് ചൂണ്ടിക്കാട്ടി നേരത്തെ നാലു പൊലീസുകാരെ സസ്പെൻഡ് ചെയ്തിരുന്നു. സംഭവത്തിൽ കേസെടുക്കാതെ പോലീസ് ഒത്തു കളിക്കുന്നുവെന്നും കുടുംബം ആരോപിക്കുന്നു. പോലീസ് വാഹനമിടിച്ച് അമൽ, വിഷ്ണു, അഭിഷേക് എന്നിവർക്കാണ് പരുക്കേറ്റത്. കുറ്റക്കാരായ പോലീസുകാർക്കെതിരെ വധശ്രമത്തിന് കേസെടുക്കണമെന്ന് പരുക്കേറ്റ യുവാവിന്റെ മാതാവ് പ്രസന്ന ഷാജു മാധ്യമങ്ങൾക്കു മുന്നിൽ പറഞ്ഞു.
Related Post
കഴിഞ്ഞ ജൂലൈ 19നാണ് കേസിനാസ്പദമായ സംഭവം നടക്കുന്നത്. തട്ടുകടയിലുണ്ടായ ചെറിയ തർക്കത്തിന് പിന്നാലെയാണ് പോലീസുകാർ വാഹനം പിന്തുടർന്ന് അമൽ, വിഷ്ണു, അഭിഷേക് എന്നീ യുവാക്കൾ സഞ്ചരിച്ച വാഹനത്തിൽ ഇടിച്ചു തെറിപ്പിച്ചത്.