കോഴിക്കോട്: മുക്കുപണ്ടം പണയം വെച്ച് പണം തട്ടിയ കേസിൽ യുവാവിനെ ഫറോക്ക് പൊലീസ് അറസ്റ്റ് ചെയ്തു. ഫറോക്ക് പെരുമുഖം കള്ളിക്കൂടം സ്വദേശി മണ്ണാങ്കണ്ടി വീട്ടിൽ അബ്ദുൾ ഖാദർ (48) ആണ് അറസ്റ്റിലായത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
കഴിഞ്ഞ വർഷം ഡിസംബറിലാണ് കേസിനാസ്പദമായ സംഭവം നടന്നത്. ഫറോക്ക് സ്വദേശിയായ ചിത്തരഞ്ജന്റെ ഉടമസ്ഥതയിൽ മണ്ണൂർ വളവിൽ പ്രവർത്തിക്കുന്ന സൗഭാഗ്യ ഫിനാൻസിയേഴ്സ് എന്ന സ്ഥാപനത്തിലാണ് തട്ടിപ്പ് നടന്നത്.
സ്ഥാപനത്തിലെത്തിയ അബ്ദുൾ ഖാദർ 24 ഗ്രാം തൂക്കം വരുന്ന മൂന്ന് വളകൾ മൂന്ന് മാസത്തെ കാലാവധിക്ക് പണയം വെച്ച് 1,71,000 രൂപ കൈപ്പറ്റുകയായിരുന്നു. കാലാവധി കഴിഞ്ഞിട്ടും ആഭരണങ്ങൾ തിരിച്ചെടുക്കാൻ എത്താതിരുന്നതിനെ തുടർന്ന് സ്ഥാപന ഉടമ വളകൾ പരിശോധിച്ചപ്പോഴാണ് അവ മുക്കുപണ്ടമാണെന്ന് വ്യക്തമായത്.
തുടർന്ന് ചിത്തരഞ്ജൻ ഫറോക്ക് പൊലീസിൽ പരാതി നൽകി. പൊലീസ് കേസെടുത്ത് അന്വേഷണം ആരംഭിക്കുകയും എസ്.ഐ മിഥുന്റെ നേതൃത്വത്തിലുള്ള സംഘം പ്രതിയെ അറസ്റ്റ് ചെയ്യുകയുമായിരുന്നു.
