ഹൈദരാബാദ്: വീട്ടുകാരുടെ സമ്മതമില്ലാതെ ഒളിച്ചോടി വിവാഹം കഴിച്ച യുവതിയെ ഭര്‍തൃവീട്ടില്‍ നിന്ന് ബലമായി പിടിച്ചിറക്കി കൊണ്ടുപോയി യുവതിയുടെ മാതാപിതാക്കളും ബന്ധുക്കളും. നാലുമാസം മുന്‍പാണ് യുവതി മാതാപിതാക്കളുടെ സമ്മതമില്ലാതെ യുവാവിനെ വിവാഹം കഴിച്ചത്. എന്നാല്‍ കഴിഞ്ഞ ദിവസം യുവതിയുടെ ബന്ധുക്കള്‍ യുവതിയുടെ ഭര്‍ത്താവിന്റെ വീട്ടിലെത്തി വീട്ടിലുള്ളവരെ ആക്രമിക്കുകയും യുവതിയെ നിലത്ത് കൂടി വലിച്ചിഴച്ച് കാറില്‍ കയറ്റിക്കൊണ്ട് പോകുകയും ആയിരുന്നു.
ഹൈദരാബാദിലെ നര്‍സംപള്ളിയിലാണ് സംഭവം.യുവതിയുടെ വീട്ടുകാര്‍ എത്തിയതിന് പിന്നാലെ യുവതിയുടെ ബന്ധുക്കളും യുവാവിന്റെ ബന്ധുക്കളും തമ്മില്‍ ആദ്യം വാക്കു തര്‍ക്കമുണ്ടായി. പിന്നാലെ യുവതിയെ വീട്ടുകാര്‍ വലിച്ചിഴച്ച് കാറില്‍ കയറ്റുകയായിരുന്നു. വരന് നല്ല ജോലിയില്ലെന്നതുകൊണ്ടാണ് യുവതിയുടെ മാതാപിതാക്കള്‍ വിവാഹത്തിന് സമ്മതിക്കാതിരുന്നത്. എന്നാല്‍ ഇവര്‍ ഒരേ ജാതിയില്‍ പെട്ടവരാണെന്ന് കീസറ പൊലീസ് അറിയിച്ചു. മുളകുപൊടി എറിഞ്ഞ ശേഷമാണ് ആക്രമണമുണ്ടായതെന്നാണ് യുവതിയുടെ ഭര്‍തൃ വീട്ടുകാര്‍ പറയുന്നത്.
സമൂഹ മാധ്യമത്തില്‍ പ്രചരിക്കുന്ന വിഡിയോയില്‍ യുവതിയെ വീടിനുള്ളില്‍ നിന്ന് പുറത്തേക്ക് വലിച്ചിഴച്ച് കൊണ്ടു വരുന്നതാണ് ആദ്യം കാണുന്നത്. യുവതി നിലത്ത് വീഴുന്നതും, അലറികരയുന്ന യുവതിയെ മണ്ണിലൂടെ വലിച്ചിഴച്ച് കാറിലേക്ക് കയറ്റുന്നതു കാണാം. കാറിന് അടുത്തെത്തുമ്പോള്‍ കാറില്‍ കയറാന്‍ സമ്മതിക്കാതിരുന്ന യുവതിയെ അവിടെ നിന്ന് ബലം പ്രയോഗിച്ചാണ് കാറിനകത്തേക്ക് കയറ്റുന്നത്. യുവതിയെ കൊണ്ടുപോകുന്നത് തടയാന്‍ വന്ന യുവാവിനെയും കുടുംബത്തെയും ഇവര്‍ ക്രൂരമായി മര്‍ദിക്കുന്നതും വിഡിയോയില്‍ കാണാം. വടി കൊണ്ട് യുവതിയുടെ വീട്ടുകാര്‍ യുവാവിനെയും കുടുംബത്തെയും മര്‍ദിക്കുന്നുണ്ട്.
