കോഴിക്കോട്: മൂന്നര വയസുള്ള കുഞ്ഞിനെ ലൈംഗികമായി പീഡിപ്പിച്ച് നാടുവിട്ട പ്രതി പിടിയിൽ. ബാലുശ്ശേരി അറപ്പീടിക സ്വദേശി കുളത്തീൽ മീത്തൽ അശ്വിൻ (തംബുരു-31) ആണ് അറസ്റ്റിലായത്. കുഞ്ഞിനെ പീഡിപ്പിച്ച ശേഷം നാടുവിട്ട ഇയാളെ രണ്ട് ദിവസത്തെ തിരച്ചിലിനൊടുവിലാണ് പോലീസ് പിടികൂടിയത്.
സ്ഥിരം കുറ്റവാളിയായ ഇയാൾ കോടഞ്ചേരി കുപ്പായക്കോട് കൈപ്പുറത്ത് ഒളിവിൽ കഴിയുകയായിരുന്നു. പ്രതിയെ ബാലുശ്ശേരി ഇൻസ്‌പെക്ടർ ടിപി ദിനേശും സംഘവുമാണ് കഴിഞ്ഞ ദിവസം പിടികൂടിയത്. കുഞ്ഞിനെ പീഡിപ്പിച്ച ശേഷം നാട്ടിൽ നിന്ന് മുങ്ങിയ ഇയാൾ വയനാട്, കോടഞ്ചേരി എന്നിവിടങ്ങളിൽ ഒളിവിൽ കഴിഞ്ഞുവരികയായിരുന്നുവെന്ന് പോലീസ് പറഞ്ഞു.
പോലീസ് ജീപ്പ് അടിച്ചു തകർത്ത കേസിൽ ഉൾപ്പെടെ നിരവധി കേസുകളിൽ പ്രതിയാണ് ഇയാൾ. എസ്‌ഐമാരായ സത്യജിത്ത്, മുഹമ്മദ് പുതുശ്ശേരി, സീനിയർ സിവിൽ പോലീസ് ഓഫീസർ ഗോകുൽ രാജ്, സിവിൽ പോലീസ് ഓഫീസർ സുജേഷ് എന്നിവരുൾപ്പെട്ട സംഘമാണ് പ്രതിയെ പിടികൂടിയത്.
