ആലുവ: കഴുത്തൊപ്പമുള്ള മുടി ഇടയ്ക്കിടയ്ക്ക് കൈകൊണ്ട് മാടിയൊതുക്കുന്ന സുഹൈലിനെയല്ല കോടതി വരാന്തയിൽ കാണാൻ സാധിച്ചത്. നീട്ടിവളർത്തിയ മുടി പറ്റെവെട്ടി ജയിൽ രീതിക്ക് അനുസരിച്ചായിരുന്നു സുഹൈൽ കോടതിയിലെത്തിയത്. എന്നാൽ തങ്ങളുടെ നിർബന്ധപ്രകാരം മുടി വെട്ടിയതല്ലെന്നും പ്രതി സ്വയം വെട്ടിയതാണെന്നും സുഹൈലിനെ റിമാൻഡിൽ പാർപ്പിച്ച കാക്കനാട് ബോസ്റ്റൽ സ്കൂൾ അധികൃതർ വ്യക്തമാക്കുന്നു.
മാത്രമല്ല നെടുമ്പാശേരി വാഹനാപകടക്കേസിൽ പിടിയിലായ സമയത്തെ ശരീരഭാഷയല്ലായിരുന്നു ഇന്നലെ കോടതിയിൽ കാണാൻ സാധിച്ചത്. നന്നേ അടുപ്പമുള്ളവർക്കു പോലും ഒറ്റനോട്ടത്തിൽ തിരിച്ചറിയാനാവാത്ത രൂപത്തിലാണു സുഹൈലും സുഹൃത്തുക്കളും കോടതിയിലെത്തിയത്.
അതേസമയം ബോസ്റ്റൽ സ്കൂൾ അന്തേവാസികൾക്കു മുടി മുറിച്ചു വൃത്തിയാകാനുള്ള ട്രിമ്മറുകൾ അധികൃതർ പൊതു ഉപയോഗത്തിനായി നൽകിയിട്ടുണ്ട്. അന്തേവാസികളിൽ പലരും ഇതു പരസ്പരം ചെയ്തു കൊടുക്കാറുമുണ്ട്. എന്നാൽ, സുഹൈൽ സ്വയം മുടി മുറിക്കുകയായിരുന്നുവെന്നാണ് അധികൃതർ വ്യക്തമാക്കുന്നത്. അതേസമയം സുഹൈലിനേയും കൂട്ടുപ്രതികളേയും രണ്ടുദിവസത്തേക്കാണ് പോലീസ് കസ്റ്റഡിയിൽ വിട്ടുകൊണ്ട് അങ്കമാലി കോടതി ഉത്തരവിട്ടത്.
