ഒംഗോൾ: ആന്ധ്രപ്രദേശിലെ പ്രകാശം ജില്ലയിൽ ആറുവയസുകാരിയെ ലൈംഗികമായി പീഡിപ്പിച്ച് കൊലപ്പെടുത്തിയെന്ന് പരാതി. സംഭവത്തിൽ ബന്ധുവായ 25കാരനെ പോലീസ് കസ്റ്റഡിയിലെടുത്തു. ഞായറാഴ്ച രാത്രി വൈകിയാണ് നാടിനെ നടുക്കിയ സംഭവം നടന്നത്.
നാഗുലുപ്പലപാട് മണ്ഡലത്തിലെ ചഡലവാഡ ഗ്രാമത്തിലാണ് സംഭവം. നിർമാണത്തൊഴിലിനായി ഹൈദരാബാദിലേക്കു പോയ മാതാപിതാക്കൾ മകളെ മുത്തശ്ശിയുടെ സംരക്ഷണത്തിലാക്കിയിരിക്കുകയായിരുന്നു. വീടിന് പുറത്താണ് കുട്ടി മുത്തശ്ശിക്കൊപ്പം ഉറങ്ങിയിരുന്നത്. ഇതേ പ്രദേശത്തുതന്നെ താമസിക്കുന്ന ആനന്ദ് എന്ന പ്രതി കുട്ടിയെ സമീപത്തെ ആളൊഴിഞ്ഞ സ്ഥലത്തേക്ക് കൊണ്ടുപോയി ലൈംഗികമായി പീഡിപ്പിച്ചെന്നാണ് പോലീസിന്റെ പ്രാഥമിക നിഗമനം.
പീഡനത്തിനിടെ കുട്ടിക്ക് ഗുരുതരമായ രക്തസ്രാവമുണ്ടായതായും സംഭവം പുറത്തറിയാതിരിക്കാനായി പ്രതി കുട്ടിയെ ശ്വാസംമുട്ടിച്ച് കൊലപ്പെടുത്തിയതായും പോലീസ് പറഞ്ഞു. തുടർന്ന് തിങ്കളാഴ്ച പുലർച്ചെ രണ്ടുമണിയോടെ കുട്ടിയുടെ മൃതദേഹം വീടിന് സമീപത്തുള്ള കസേരയിൽ ഇരുത്തിയ ശേഷം പ്രതി സ്ഥലത്തുനിന്ന് കടന്നുകളഞ്ഞെന്നാണ് വിവരം.
കുട്ടി കസേരയിൽ അബോധാവസ്ഥയിൽ കിടക്കുന്നത് ശ്രദ്ധയിൽപ്പെട്ട മുത്തശ്ശി അയൽവാസികളെ വിവരമറിയിച്ചു. തുടർന്ന് നാട്ടുകാർ ചേർന്ന് കുട്ടിയെ സമീപത്തെ ആശുപത്രിയിലെത്തിച്ചെങ്കിലും മരണം സംഭവിച്ചതായി ഡോക്ടർമാർ സ്ഥിരീകരിച്ചു.
സംഭവത്തിൽ പ്രകോപിതരായ നാട്ടുകാർ പ്രതിക്കായി തിരച്ചിൽ നടത്തുകയും തിങ്കളാഴ്ച പുലർച്ചെ ഇയാളെ പിടികൂടുകയും ചെയ്തു. തുടർന്ന് ഇയാളെ മർദിച്ചശേഷം പോലീസിന് കൈമാറി. പ്രതിയെ ചോദ്യം ചെയ്യുന്നതിനായി കസ്റ്റഡിയിലെടുത്തതായി പോലീസ് ഉദ്യോഗസ്ഥൻ അറിയിച്ചു. കുറ്റകൃത്യം നടത്തിയ സമയത്ത് ഇയാൾ കഞ്ചാവിന്റെ ലഹരിയിലായിരുന്നുവെന്നാണ് പ്രാഥമിക വിവരം.
സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്. പോസ്റ്റ്‌മോർട്ടം പരിശോധനയുടെ റിപ്പോർട്ടും പ്രതിക്കെതിരെ ചുമത്തുന്ന ഔദ്യോഗിക കുറ്റങ്ങളും സംബന്ധിച്ച കൂടുതൽ വിവരങ്ങൾ പുറത്തുവന്നിട്ടില്ല. അതേസമയം കുട്ടിയുടെ മരണത്തിൽ പ്രതിഷേധിച്ച് കുടുംബാംഗങ്ങളും നാട്ടുകാരും ചേർന്ന് ചഡലവാഡയ്ക്ക് സമീപം ഒംഗോൾ–ചീരാല പ്രധാന റോഡിൽ മൃതദേഹം വെച്ച് പ്രതിഷേധിച്ചു. പ്രതിക്കെതിരെ കർശന നടപടി സ്വീകരിക്കണമെന്നാവശ്യപ്പെട്ടായിരുന്നു പ്രതിഷേധം. അധികൃതർ തങ്ങളുടെ ആവശ്യങ്ങളിൽ വ്യക്തമായ ഉറപ്പ് നൽകുന്നതുവരെ പ്രതിഷേധത്തിൽനിന്ന് പിന്മാറില്ലെന്ന നിലപാടിലായിരുന്നു കുടുംബാംഗങ്ങളും നാട്ടുകാരും.
റോഡ് ഉപരോധത്തെത്തുടർന്ന് മേഖലയിൽ ഗതാഗതം സ്തംഭിച്ചു. റോഡിന്റെ ഇരുവശങ്ങളിലുമായി ഏകദേശം മൂന്ന് കിലോമീറ്ററോളം ദൂരത്തിൽ വാഹനങ്ങൾ കുടുങ്ങി. വിവരമറിഞ്ഞ് ഒംഗോളിൽനിന്ന് മുതിർന്ന പോലീസ് ഉദ്യോഗസ്ഥർ സ്ഥലത്തെത്തി പ്രതിഷേധക്കാരുമായി ചർച്ച നടത്തി. കൊലപാതകക്കുറ്റം ചുമത്തുന്നതിനൊപ്പം പോക്സോ നിയമപ്രകാരവും കേസെടുക്കുമെന്ന് ഉദ്യോഗസ്ഥർ ഉറപ്പുനൽകിയതോടെയാണ് ഉപരോധം അവസാനിപ്പിച്ചത്.
കേസ് അതിവേഗ കോടതിയിലൂടെ പരിഗണിക്കുന്നതിനുള്ള നടപടികൾ സ്വീകരിക്കുമെന്നും ഇരയുടെ കുടുംബത്തിന് സർക്കാർ സഹായം ലഭ്യമാക്കുമെന്നും അധികൃതർ ഉറപ്പുനൽകിയതായി റിപ്പോർട്ടുകളുണ്ട്. തുടർന്ന് കുട്ടിയുടെ മൃതദേഹം പോസ്റ്റ്‌മോർട്ടം ഉൾപ്പെടെയുള്ള നടപടികൾക്കായി ഒംഗോളിലെ രാജീവ് ഗാന്ധി ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ് (റിംസ്) ആശുപത്രിയിലേക്ക് മാറ്റി. പോസ്റ്റ്‌മോർട്ടം റിപ്പോർട്ട് പുറത്തുവന്നശേഷം മരണവുമായി ബന്ധപ്പെട്ട കൂടുതൽ വിവരങ്ങൾ വ്യക്തമാകുമെന്നാണ് പ്രതീക്ഷിക്കുന്നത്.
