ഇസ്ലാമാബാദ്: പശ്ചിമേഷ്യയിൽ സുരക്ഷാ ഭീഷണികൾ വർധിക്കുന്ന സാഹചര്യത്തിൽ സൗദി അറേബ്യയ്ക്കുള്ള സൈനിക സഹായം ശക്തമാക്കി പാകിസ്താൻ. സൗദിയിലെ പ്രധാന നഗരങ്ങളുടെയും തന്ത്രപ്രധാന കേന്ദ്രങ്ങളുടെയും സുരക്ഷ ഉറപ്പാക്കുന്നതിനായി വ്യോമപ്രതിരോധ സംവിധാനങ്ങൾ, മിസൈലുകൾ, റോക്കറ്റുകൾ, തദ്ദേശീയമായി വികസിപ്പിച്ച ഡ്രോണുകൾ എന്നിവയുൾപ്പെടെയുള്ള സൈനിക ഉപകരണങ്ങളും കൂടുതൽ സൈനികരെയും പാകിസ്താൻ അയച്ചുതുടങ്ങിയതായാണ് റിപ്പോർട്ടുകൾ.
സൈനികരെയും പ്രതിരോധ ഉപകരണങ്ങളെയും സൗദിയിലെത്തിക്കുന്നതിനായി പാകിസ്താൻ വ്യോമസേനയുടെ ഗതാഗത വിമാനങ്ങളും സൈനിക കാർഗോ വിമാനങ്ങളും തുടർച്ചയായി സർവീസ് നടത്തുന്നുണ്ട്. പാകിസ്താൻ വ്യോമസേനയുടെ ഐ.എൽ-78 (IL-78) വ്യോമ ഇന്ധനം നിറയ്ക്കൽ വിമാനവും സൗദി വ്യോമാതിർത്തിയിൽ പ്രവേശിച്ചതായി റിപ്പോർട്ടുകളുണ്ട്.
2025 സെപ്റ്റംബറിൽ ഇരുരാജ്യങ്ങളും ഒപ്പുവെച്ച തന്ത്രപ്രധാന പരസ്പര പ്രതിരോധ കരാറിന്റെ അടിസ്ഥാനത്തിലാണ് സൈനിക സഹകരണം ശക്തമാക്കുന്നതെന്നാണ് വിവരം. കരാർ പ്രകാരം ഒരു രാജ്യത്തിന് നേരെയുണ്ടാകുന്ന ആക്രമണം ഇരുരാജ്യങ്ങൾക്കും നേരെയുള്ള ആക്രമണമായി കണക്കാക്കുമെന്നാണ് ധാരണ.
ദശകങ്ങളായി സൗദി അറേബ്യയിൽ പാകിസ്താൻ സൈനിക സാന്നിധ്യമുണ്ടെങ്കിലും പരിശീലനവും പ്രതിരോധ സഹകരണവുമായിരുന്നു പ്രധാനമായും ശ്രദ്ധ കേന്ദ്രീകരിച്ചിരുന്നത്. എന്നാൽ, യെമനിലെ ഹൂതികളുടെ ഭീഷണി ഉൾപ്പെടെ മേഖലയിൽ നിലനിൽക്കുന്ന സുരക്ഷാ വെല്ലുവിളികളുടെ പശ്ചാത്തലത്തിൽ സൗദിയിലെ തന്ത്രപ്രധാന കേന്ദ്രങ്ങളുടെ സംരക്ഷണത്തിനായി കൂടുതൽ പാക് സൈനികരെ ചെറുസംഘങ്ങളായി വിന്യസിക്കുന്നതായും റിപ്പോർട്ടുകൾ വ്യക്തമാക്കുന്നു.
