തിരുവനന്തപുരം: അട്ടപ്പാടിയിൽ പത്തുമാസത്തിനിടെ പത്തുകുട്ടികൾ മരിച്ചതായി വി.കെ. ശ്രീകണ്ഠൻ എംപി. വിഷയം ഗൗരവത്തോടെ കാണണമെന്നും മേഖലയിൽ അരിവാൾ രോഗം വ്യാപകമാണെന്നും അദ്ദേഹം ചൂണ്ടിക്കാട്ടി. രോഗം ഇല്ലാതാക്കുന്നതിനായി മുൻകാല സർക്കാരുകളുടെ ഭാഗത്തുനിന്ന് നിരവധി ശ്രമങ്ങൾ ഉണ്ടായിട്ടുണ്ടെന്നും എംപി പറഞ്ഞു.
അട്ടപ്പാടിയിലെ ശിശുമരണങ്ങളെ രാഷ്ട്രീയമായി കാണരുത്. എന്നാൽ പാലക്കാട്ടെ ചില രാഷ്ട്രീയക്കാർ വിഷയം രാഷ്ട്രീയവത്കരിക്കുകയാണെന്നും മുൻമന്ത്രിമാർ ഉൾപ്പെടെയുള്ളവർ ഇത് ദുരുപയോഗം ചെയ്യുന്നുണ്ടെന്നും ശ്രീകണ്ഠൻ വിമർശിച്ചു.
കഴിഞ്ഞ പത്തുവർഷത്തിനിടെ അട്ടപ്പാടിയിൽ ശിശുമരണങ്ങളൊന്നും ഉണ്ടായിട്ടില്ലെന്ന തരത്തിൽ തെറ്റിദ്ധരിപ്പിക്കുന്ന പ്രചാരണം നടക്കുന്നുണ്ട്. രാജേഷ് സ്പീക്കറായും മന്ത്രിയായും പ്രവർത്തിച്ച കാലയളവിൽ 42 ശിശുമരണങ്ങൾ ഉണ്ടായിട്ടുണ്ടെന്നും എംപി ആരോപിച്ചു. ഇതുമായി ബന്ധപ്പെട്ട് രാജേഷ് നടത്തിയ പ്രസ്താവന നിരുത്തരവാദപരമാണെന്നും വി.കെ. ശ്രീകണ്ഠൻ പറഞ്ഞു.
