കൊച്ചി: അരിയിൽ ഷുക്കൂർ വധക്കേസിൽ ജീവപര്യന്തം ശിക്ഷിക്കപ്പെട്ട പ്രതികളെ കോടതിയിൽ നിന്ന് ജയിലിലേക്ക് കൊണ്ടുപോകുമ്പോൾ അഭിവാദ്യമർപ്പിച്ച് സിപിഎം പ്രവർത്തകർ. കൊച്ചിയിലെ പ്രത്യേക സിബിഐ കോടതിയുടെ മുന്നിൽ വെച്ചാണ് സിപിഎം പ്രവർത്തകർ മുദ്രാവാക്യം വിളികളോടെ പ്രതികളെ ജയിലിലേക്ക് യാത്രയാക്കിയത്. ഇതോടെ പോലീസ് ബസിലേക്ക് കയറും മുമ്പ് മുഷ്ടി ചുരുട്ടി തിരികെ അഭിവാദ്യമർപ്പിക്കുകയും ചെയ്തു പ്രതികളും.
‘അഭിവാദ്യങ്ങൾ അഭിവാദ്യങ്ങൾ, ധീരസഖാക്കൾക്ക് അഭിവാദ്യങ്ങൾ, ലാൽസലാം സഖാക്കളേ, കൂടെയുണ്ട് ഞങ്ങളും, ജയിലറ കണ്ട് വിരണ്ടവരല്ല, ജയിലറ കണ്ട് വിറച്ചവരല്ല. ജയിലറ കണ്ട് വളർന്നവരാണേ’ തുടങ്ങിയ മുദ്രാവാക്യം വിളികളോടെയാണു പ്രവർത്തകർ പ്രതികളെ യാത്രയാക്കിയത്. കൊലക്കുറ്റത്തിന് ജീവപര്യന്തം തടവിന് ശിക്ഷിക്കപ്പെട്ട ഏഴ് പ്രതികൾക്കാണ് സിപിഎം പ്രവർത്തകർ അഭിവാദ്യമർപ്പിച്ചത്. ബസിൽ കയറിയ പ്രതികൾ പുറത്തുനിൽക്കുന്ന സിപിഎം പ്രവർത്തകർക്ക് ജനലിലൂടെ കൈ നൽകുകയും ചെയ്തു.
അതേസമയം എറണാകുളം സബ്ജയിലിലേക്ക് മാറ്റിയ പ്രതികളെ വെള്ളിയാഴ്ച കണ്ണൂർ സെൻട്രൽ ജയിലിലേക്ക് മാറ്റും. അരിയിൽ അബ്ദുൾ ഷുക്കൂർ വധക്കേസിൽ കെ.വി. സുമേഷ്, അനൂപ്, പവിത്രൻ, മനോഹരൻ പി.വി., മൈന ദിനേശൻ, ബിജു മോൻ, ഷിജിൻ മോഹൻ എന്നീ പ്രതികൾക്കാണ് ജീവപര്യന്തം ലഭിച്ചത്.