ബെർലിൻ: ജർമനിയിലെ കൊളോൺ നഗരത്തിൽ 16 വയസ്സുകാരിക്കുനേരേ ഹ്യൂമനോയിഡ് റോബോട്ട് ലൈംഗികാതിക്രമം നടത്തിയെന്ന പരാതിയിൽ രണ്ട് പേർക്കെതിരേ പൊലീസ് അന്വേഷണം ആരംഭിച്ചു. റോബോട്ടിന്റെ ഉടമയായ 16-കാരനും ഇയാളുടെ 19-കാരനായ സുഹൃത്തിനുമെതിരേയാണ് അന്വേഷണം. സംഭവത്തിന്റെ ദൃശ്യങ്ങൾ ചിത്രീകരിക്കുകയും സാമൂഹികമാധ്യമങ്ങളിലൂടെ തത്സമയം സംപ്രേഷണം നടത്തുകയും ചെയ്തതായും റിപ്പോർട്ടുണ്ട്.
ശനിയാഴ്ച രാത്രി റസ്റ്ററന്റിന് പുറത്തുവെച്ചായിരുന്നു സംഭവം. സുഹൃത്തുക്കൾക്കൊപ്പം നിൽക്കുകയായിരുന്ന പെൺകുട്ടിയുടെ അടുത്തേക്ക് നാലടിയോളം ഉയരമുള്ള റോബോട്ട് എത്തുകയായിരുന്നു. റോബോട്ടിനെ ആശ്ലേഷിക്കുന്നതിനിടെ പെൺകുട്ടിയെ കയറിപ്പിടിക്കുകയും ശരീരത്തിൽ അനുചിതമായി സ്പർശിക്കുകയും ചെയ്തതോടെ പെൺകുട്ടി ബഹളംവെച്ച് പിന്നോട്ട് മാറി.
പെൺകുട്ടി പൊലീസിൽ പരാതി നൽകിയതിനെത്തുടർന്ന് നടത്തിയ അന്വേഷണത്തിൽ ഒരു കാറിന്റെ ഡിക്കിയിൽനിന്ന് റോബോട്ടിനെ കണ്ടെത്തി. റോബോട്ടും ഉടമയുടെയും സുഹൃത്തിന്റെയും മൊബൈൽ ഫോണുകളും പൊലീസ് കസ്റ്റഡിയിലെടുത്തു. സംഭവത്തിൽ കൂടുതൽ അന്വേഷണം പുരോഗമിക്കുകയാണ്.
