ഇസ്ലാമാബാദ്: പാക് അധിനിവേശ കശ്മീരിലെ റാവൽക്കോട്ടിൽ പ്രക്ഷോഭകരും സുരക്ഷാസേനയും തമ്മിലുള്ള ഏറ്റുമുട്ടൽ രൂക്ഷമായി. സംഘർഷത്തിൽ ഇതുവരെ 30ഓളം പേർ കൊല്ലപ്പെട്ടതായി വാർത്താ ഏജൻസികൾ റിപ്പോർട്ട് ചെയ്തു. ജൂലായ് 27ന് നടന്ന പ്രതിഷേധത്തിനിടെയുണ്ടായ വെടിവെപ്പിൽ മാത്രം 14 പ്രവർത്തകർ കൊല്ലപ്പെട്ടതായി പ്രക്ഷോഭം നയിക്കുന്ന ജോയിന്റ് അവാമി ആക്ഷൻ കമ്മിറ്റി ആരോപിച്ചു.
അടിസ്ഥാന സൗകര്യങ്ങൾ, രാഷ്ട്രീയ അവകാശങ്ങൾ, വിലക്കയറ്റം, ഉയർന്ന വൈദ്യുതി നിരക്ക് എന്നിവയ്ക്കെതിരെയാണ് ജനങ്ങൾ പ്രതിഷേധവുമായി തെരുവിലിറങ്ങിയത്. തങ്ങൾ ഭീകരവാദികളല്ലെന്നും അടിസ്ഥാന ആവശ്യങ്ങൾക്കുവേണ്ടിയാണ് പോരാടുന്നതെന്നും പ്രക്ഷോഭകർ പറയുന്നു. “ഞങ്ങൾ ആവശ്യപ്പെട്ടത് ഭക്ഷണവും വൈദ്യുതിയുമാണ്, എന്നാൽ പകരം ഞങ്ങൾക്ക് ലഭിക്കുന്നത് വെടിയുണ്ടകളാണ്” എന്നാണ് പരിക്കേറ്റ ഒരു യുവാവ് പ്രതികരിച്ചത്.
സംഘർഷത്തിൽ ഇരയായവരിൽ ഭൂരിഭാഗവും 15നും 35നും ഇടയിൽ പ്രായമുള്ള യുവാക്കളാണെന്നാണ് റിപ്പോർട്ടുകൾ. പരിക്കേറ്റവർക്ക് ആവശ്യമായ ചികിത്സ നൽകാൻ പോലും കഴിയാത്ത സാഹചര്യമാണ് മേഖലയിലെ ആരോഗ്യ സംവിധാനങ്ങളിലുള്ളത്. താൽക്കാലിക ചികിത്സാ കേന്ദ്രങ്ങളിൽ നിരവധി വെടിയേറ്റവർ ചികിത്സ തേടിയെത്തുന്നുണ്ട്. ഗുരുതരമായി പരിക്കേറ്റവർക്ക് മികച്ച ആശുപത്രി ചികിത്സ ആവശ്യമാണെങ്കിലും, അവിടെ എത്തിയാൽ അറസ്റ്റ് ചെയ്യപ്പെടുമെന്ന ഭയത്താൽ പലരും താൽക്കാലിക ക്ലിനിക്കുകളെ ആശ്രയിക്കുന്നതായും റിപ്പോർട്ടുകളുണ്ട്.
റീജിയണൽ ലെജിസ്ലേറ്റീവ് അസംബ്ലിയിലെ 12 സീറ്റുകളെച്ചൊല്ലിയുള്ള തർക്കവും സംഘർഷം രൂക്ഷമാകാൻ കാരണമായിട്ടുണ്ട്. ജമ്മു കശ്മീരിൽ നിന്നുള്ള അഭയാർഥികൾക്കായി സംവരണം ചെയ്തിട്ടുള്ള ഈ സീറ്റുകളിൽ കൃത്രിമം കാണിച്ച് തിരഞ്ഞെടുപ്പ് ഫലം അട്ടിമറിക്കാൻ അധികൃതർ ശ്രമിക്കുന്നുവെന്നാണ് ജോയിന്റ് അവാമി ആക്ഷൻ കമ്മിറ്റിയുടെ ആരോപണം. തങ്ങൾക്ക് ഇഷ്ടപ്പെട്ട ഒരാളെ പ്രധാനമന്ത്രിയാക്കുന്നതിനായി സീറ്റുകൾ ഉപയോഗിക്കുകയാണെന്നും പ്രക്ഷോഭകർ ആരോപിക്കുന്നു.
ജൂലായ് 27ന് അയ്യായിരത്തോളം പേരാണ് റാവൽക്കോട്ട് നഗരത്തിലേക്ക് പ്രതിഷേധ മാർച്ച് നടത്തിയത്. പ്രതിഷേധക്കാരെ നഗരത്തിലേക്ക് പ്രവേശിക്കുന്നത് തടഞ്ഞ അധികൃതർ യാതൊരു പ്രകോപനവുമില്ലാതെ വെടിവെപ്പ് നടത്തിയെന്നാണ് ആക്ഷൻ കമ്മിറ്റി ഭാരവാഹികളുടെ ആരോപണം.
എന്നാൽ നിരോധിക്കപ്പെട്ട ആയുധധാരികളായ സംഘങ്ങൾ സുരക്ഷാസേനയ്ക്ക് നേരെ ആദ്യം വെടിയുതിർത്തുവെന്നും അതിനെ പ്രതിരോധിക്കുക മാത്രമാണ് ചെയ്തതെന്നുമാണ് പോലീസിന്റെ വാദം.
സംഘർഷം രൂക്ഷമായതോടെ മേഖലയിലെ സാധാരണ ജീവിതവും താളം തെറ്റി. ഏകദേശം 45 ലക്ഷം ജനങ്ങളെ ബാധിക്കുന്ന തരത്തിൽ ബാങ്കിങ്, ഗതാഗതം, ഇന്റർനെറ്റ് സേവനങ്ങൾ എന്നിവ തടസ്സപ്പെട്ടതായി റിപ്പോർട്ടുണ്ട്.
കഴിഞ്ഞ ജൂണിൽ പ്രാദേശിക സർക്കാർ ജോയിന്റ് അവാമി ആക്ഷൻ കമ്മിറ്റിയെ നിരോധിച്ചതിന് പിന്നാലെയാണ് പ്രതിഷേധം കൂടുതൽ ശക്തമായത്. സുരക്ഷാ കാരണങ്ങളാൽ മൂന്ന് ഘട്ടങ്ങളായാണ് തിരഞ്ഞെടുപ്പ് നടക്കുന്നത്. ഓഗസ്റ്റ് 10ന് നിശ്ചയിച്ചിട്ടുള്ള മൂന്നാം ഘട്ട വോട്ടെടുപ്പ് നിലവിലെ സംഘർഷങ്ങളുടെ പശ്ചാത്തലത്തിൽ എങ്ങനെ നടക്കുമെന്നതിലും ആശങ്ക നിലനിൽക്കുകയാണ്.
പ്രക്ഷോഭകരെ നേരിടാൻ സുരക്ഷാസേനയ്ക്ക് കടുത്ത നിർദേശങ്ങൾ നൽകിയിട്ടുണ്ടെന്നാണ് റിപ്പോർട്ടുകൾ. ആക്ഷൻ കമ്മിറ്റി പ്രവർത്തകരിൽനിന്ന് പിടിച്ചെടുത്തതായി പറയുന്ന ആയുധങ്ങൾ പോലീസ് വാർത്താസമ്മേളനങ്ങളിൽ പ്രദർശിപ്പിച്ചു. ഓരോ പാരാമിലിട്ടറി ഉദ്യോഗസ്ഥനെയും കൊല്ലുന്നവർക്ക് പത്ത് മില്യൺ രൂപ പ്രതിഫലം വാഗ്ദാനം ചെയ്തിട്ടുണ്ടെന്ന വിവരം അന്വേഷണത്തിനിടെ ലഭിച്ചതായും പോലീസ് അവകാശപ്പെട്ടു. എന്നാൽ തങ്ങൾ സമാധാനപരമായാണ് പ്രതിഷേധിച്ചതെന്ന് പ്രക്ഷോഭകർ ആവർത്തിക്കുന്നു.
അതിനിടെ പാക് അധിനിവേശ കശ്മീരിലെ ജനങ്ങൾക്കെതിരായ നടപടിയെ ഇന്ത്യ ശക്തമായി അപലപിച്ചു. സമാധാനപരമായി പ്രതിഷേധിക്കുന്ന പൗരന്മാർക്ക് നേരെ പാക് അധികൃതർ “ക്രൂരമായ ബലപ്രയോഗമാണ്” നടത്തുന്നതെന്ന് വിദേശകാര്യ മന്ത്രാലയ വക്താവ് രൺധീർ ജയ്‌സ്വാൾ പറഞ്ഞു.
മേഖലയിലെ ജനങ്ങളെ “ശത്രുക്കൾ” എന്ന് പാകിസ്താൻ പ്രതിരോധ മന്ത്രി വിശേഷിപ്പിച്ചത് അവിടുത്തെ ഭരണകൂടത്തിന് ജനങ്ങളോടുള്ള മനോഭാവമാണ് വ്യക്തമാക്കുന്നതെന്നും ഇന്ത്യ ആരോപിച്ചു. പാക് അധിനിവേശ കശ്മീരിലെ സ്ഥിതിഗതികളിൽ അന്താരാഷ്ട്ര സമൂഹം ഇടപെടണമെന്നും ഇന്ത്യ ആവശ്യപ്പെട്ടു.
