ഇടുക്കി: ഇടുക്കി ജില്ലയിൽ പൊലീസ് ഉദ്യോഗസ്ഥർക്കിടയിൽ സമാന്തര വാട്സ്ആപ്പ് ഗ്രൂപ്പ് രൂപീകരിച്ചത് വിവാദമാകുന്നു. പൊലീസ് അസോസിയേഷന്റെ ഔദ്യോഗിക ഗ്രൂപ്പ് നിലവിലിരിക്കെയാണ് ‘നീലക്കുപ്പായം’ എന്ന പേരിൽ സമാന്തര കൂട്ടായ്മ ആരംഭിച്ചത്. കോൺഗ്രസ് അനുഭാവ നിലപാടുള്ള ഉദ്യോഗസ്ഥരാണ് ഗ്രൂപ്പിലുള്ളത്. മുൻ മുഖ്യമന്ത്രി ഉമ്മൻചാണ്ടിയുടെ ചിത്രമാണ് ഗ്രൂപ്പിന്റെ ഡിപിയായി നൽകിയിരിക്കുന്നത്. ‘നീലക്കുപ്പായം’ ഗ്രൂപ്പിലെ സ്ക്രീൻഷോട്ടുകൾ ഒരു ഉദ്യോഗസ്ഥൻ ഔദ്യോഗിക ഗ്രൂപ്പിൽ പങ്കുവെച്ചതോടെയാണ് സംഭവം പുറത്തറിയുന്നത്.
സമാന്തര വാട്സ്ആപ്പ് ഗ്രൂപ്പായ ‘നീലക്കുപ്പായ’ത്തിനെതിരെ പരാതി നൽകാൻ പൊലീസ് സേനയിലെ ഒരുവിഭാഗം ഉദ്യോഗസ്ഥർ രംഗത്തെത്തിയിട്ടുണ്ട്. സംഭവത്തിൽ സ്പെഷ്യൽ ബ്രാഞ്ച് അന്വേഷണം ആരംഭിച്ചു. ഭരണമാറ്റമുണ്ടായിട്ടും പൊലീസ് അസോസിയേഷന്റെ തലപ്പത്ത് ഇപ്പോഴും ഇടത് അനുകൂലികളായ ഉദ്യോഗസ്ഥർ തുടരുന്നതിലുള്ള അതൃപ്തിയാണ് സമാന്തര കൂട്ടായ്മ രൂപീകരണത്തിന് പിന്നിലെന്നാണ് സൂചന. ഇതോടെയാണ് ഇടുക്കിയിലെ കോൺഗ്രസ് അനുകൂല പൊലീസ് ഉദ്യോഗസ്ഥർ പ്രത്യേക വാട്സ്ആപ്പ് ഗ്രൂപ്പ് ആരംഭിച്ചതെന്നാണ് വിവരം.
