തിരുവനന്തപുരം: ക്രിമിനൽ കേസ് പ്രതി അർജുൻ ആയങ്കിക്കൊപ്പമുള്ളതെന്ന പേരിൽ വ്യാജ എഐ ചിത്രം നിർമിച്ച് പ്രചരിപ്പിച്ചവർക്കെതിരെ നിയമനടപടി ആരംഭിച്ചതായി സിപിഎം നേതാവ് പി. ജയരാജൻ. ഫെയ്സ്ബുക്ക് പോസ്റ്റിലൂടെയാണ് അദ്ദേഹം ഇക്കാര്യം വ്യക്തമാക്കിയത്.
’27 വർഷം മുൻപ് ഒരു തിരുവോണ നാളിൽ ആർഎസ്എസ് ക്രിമിനലുകൾ വെട്ടിയരിഞ്ഞതാണ് എന്റെ ഇടതുകൈയിലെ പെരുവിരൽ. ഇപ്പോൾ ചിലർ എഐ സർജറിയിലൂടെ നഷ്ടപ്പെട്ട വിരൽ അടക്കം ചേർത്ത് തന്നിട്ടുണ്ട്. ഇത്തരം വ്യാജ പ്രചാരണത്തിനെതിരേ നിയമനടപടി തുടങ്ങി’, പി. ജയരാജൻ ഫെയ്സ്ബുക്കിൽ കുറിച്ചു. അർജുൻ ആയങ്കിയ്ക്കൊപ്പമുള്ള തന്റെ വ്യാജ എഐ ചിത്രവും ജയരാജൻ പോസ്റ്റിനൊപ്പം പങ്കുവെച്ചിട്ടുണ്ട്.
അർജുൻ ആയങ്കിക്കൊപ്പമുള്ളതെന്ന തരത്തിൽ പ്രചരിക്കുന്ന വ്യാജ എഐ ചിത്രവും പി. ജയരാജൻ ഫെയ്സ്ബുക്ക് പോസ്റ്റിനൊപ്പം പങ്കുവെച്ചിട്ടുണ്ട്.
പൊലീസിനെയും ആഭ്യന്തര വകുപ്പിനെയും ഭീഷണിപ്പെടുത്തിയെന്ന കേസിൽ ഒളിവിലായിരുന്ന അർജുൻ ആയങ്കിയെ കഴിഞ്ഞ ദിവസമാണ് പൊലീസ് കണ്ണൂരിൽനിന്ന് അറസ്റ്റ് ചെയ്തത്. ഇതിനുപിന്നാലെയാണ് പി. ജയരാജൻ അർജുൻ ആയങ്കിക്കൊപ്പമുണ്ടെന്ന തരത്തിൽ ചില എഐ നിർമിത ചിത്രങ്ങൾ സാമൂഹികമാധ്യമങ്ങളിൽ പ്രചരിച്ചത്.
