പത്തനംതിട്ട: കോഴഞ്ചേരി മാരാമൺ റിസോർട്ടിൽ യുവതിയെ കുത്തിക്കൊലപ്പെടുത്തി. റിസോർട്ടിലെ റിസപ്ഷനിസ്റ്റ് ദിൽഷയെ (20) ആണ് സുഹൃത്ത് ജിത്തു കൊലപ്പെടുത്തിയത്. കുളത്തൂപ്പുഴ സ്വദേശിയാണ് മരിച്ച ദിൽഷ. കീഴൂകര സ്വദേശിയാണ് പിടിയിലായ ജിത്തു. പ്രണയ നൈരാശ്യമാണ് കൊലപാതകത്തിനു പിന്നിലെന്നാണ് പോലീസിന്റെ പ്രാഥമിക നിഗമനം. ഇന്ന് ഉച്ചയ്ക്ക് രണ്ടുമണിയോടെയായിരുന്നു സംഭവം.
ഉച്ചയ്ക്ക് റിസപ്ഷനിനു മുന്നിലെത്തിയ ജിത്തു ദിൽഷയെ പുറത്തേക്കു വിളിക്കുകയായിരുന്നു. 15 മിനിറ്റോളം ഇരുവരും സംസാരിച്ചുനിന്നു. പിന്നാലെ കയ്യിൽ കരുതിയിരുന്ന കത്തി ഉപയോഗിച്ച് കുത്തുകയായിരുന്നു. അഞ്ചോളം കുത്തുകൾ ദിൽഷയുടെ ശരീരത്തിലേറ്റിരുന്നു.
ദിൽഷയുടെ കരച്ചിൽ കേട്ട് ഓടിയെത്തിയ റിസോർട്ടിലുണ്ടായിരുന്നവർ ഇവരെ ആശുപത്രിയിലെത്തിക്കുകയായിരുന്നു. ആശുപത്രിയിലെത്തി അരമണിക്കൂറിനകം ദിൽഷയുടെ മരണം സംഭവിക്കുകയായിരുന്നു.
ഇതിനിടെ ജിത്തുവിനെ പിടികൂടിയ നാട്ടുകാർ സമീപത്തെ ആൽമരത്തിൽ കെട്ടിയിട്ട ശേഷം പോലീസിനെ വിളിച്ച് കൈമാറുകയായിരുന്നു.
