തൃശൂർ: കഞ്ചാവ് വിൽപ്പന പൊലീസിൽ അറിയിച്ചതിലുള്ള വൈരാഗ്യത്തെ തുടർന്ന് യൂത്ത് കോൺഗ്രസ് നേതാവിന്റെ വീടുകയറി ആക്രമണം. കല്ലൂർ പുല്ലുത്തിയിൽ യൂത്ത് കോൺഗ്രസ് തൃക്കൂർ മണ്ഡലം പ്രസിഡന്റ് റിന്റോ പുതുപ്പള്ളിവളപ്പിലിന്റെ വീടിനു നേരെയാണ് ലഹരിസംഘത്തിന്റെ ആക്രമണമുണ്ടായത്. സംഭവത്തിൽ റിന്റോയ്ക്കും സഹോദരൻ റിജോയ്ക്കും അമ്മ മേരീസിനും പരുക്കേറ്റു. ചെവിക്കും കാലിനും പരുക്കേറ്റ റിന്റോയും കണ്ണിന് ഗുരുതരമായി പരുക്കേറ്റ റിജോയും തൃശൂരിലെ സ്വകാര്യ ആശുപത്രിയിൽ ചികിത്സ തേടി. കൈയ്ക്ക് പരുക്കേറ്റ മേരീസ് പുതുക്കാട് താലൂക്ക് ആശുപത്രിയിൽ പ്രാഥമിക ചികിത്സ നേടി.
വ്യാഴാഴ്ച രാത്രി പത്തോടെയായിരുന്നു സംഭവം. ഓട്ടോറിക്ഷയിലും ബൈക്കിലുമായി എത്തിയ രണ്ടുപേരാണ് ആക്രമണം നടത്തിയത്. വീട്ടിൽ അതിക്രമിച്ചുകയറിയ പ്രതികൾ മേരീസിനെ പുറത്തേക്ക് വലിച്ചിഴച്ചെന്നാണ് പരാതി. ഇതു കണ്ട് തടയാനെത്തിയ റിജോയുടെ കണ്ണിൽ വാഹനത്തിന്റെ താക്കോൽ കൊണ്ടും ഇടിക്കട്ട കൊണ്ടും കുത്തിപ്പരുക്കേൽപ്പിച്ചു. വിവരമറിഞ്ഞെത്തിയ റിന്റോയെ റോഡിലിട്ട് മർദിക്കുകയും ചെയ്തു.
ഇവരുടെ നിലവിളി കേട്ട് സമീപവാസികൾ ഓടിയെത്തിയതോടെ പ്രതികൾ ബൈക്ക് ഉപേക്ഷിച്ച് ഓട്ടോറിക്ഷയിൽ രക്ഷപ്പെട്ടു. പ്രതികളിലൊരാളായ സമീപവാസിയെ പൊലീസ് പിന്തുടർന്ന് പിടികൂടി. പരുക്കേറ്റവരെ നാട്ടുകാരാണ് ആശുപത്രിയിലെത്തിച്ചത്.
മാസങ്ങൾക്കു മുമ്പ് പ്രതികൾ നടത്തുന്ന കഞ്ചാവ് വിൽപ്പനയെക്കുറിച്ച് റിന്റോ പൊലീസിൽ വിവരം നൽകിയിരുന്നു. ഇതിലുള്ള വൈരാഗ്യമാണ് ആക്രമണത്തിനു പിന്നിലെന്നാണ് പുതുക്കാട് പൊലീസിന്റെ വിശദീകരണം. പ്രദേശത്തെ ലഹരിസംഘങ്ങളെ പിടികൂടണമെന്നും ആക്രമണത്തിന് ഉത്തരവാദികളായവർക്കെതിരെ ശക്തമായ നടപടി സ്വീകരിക്കണമെന്നും കൊടകര ബ്ലോക്ക് പഞ്ചായത്തംഗം ജെറോം ജോണും വാർഡ് മെമ്പർ സജിത രാജീവും ആവശ്യപ്പെട്ടു.
പ്രതികൾക്കെതിരെ വീടുകയറി ആക്രമണം, കൊലപാതകശ്രമം തുടങ്ങിയ വകുപ്പുകൾ ചുമത്തി കേസെടുത്തു. രക്ഷപ്പെട്ട പ്രതിക്കായി പൊലീസ് അന്വേഷണം ആരംഭിച്ചു.