തൃശൂർ: വലപ്പാട് ബീച്ചിൽ യുവതിയെയും നാലര വയസുള്ള മകനെയും ഭർത്താവ് കഴുത്തറുത്ത് കൊന്നതിന്റെ നടുക്കം മാറാതെ ബന്ധുക്കൾ. യുവാവിന് മദ്യപാനമോ മറ്റ് ദുശ്ശീലങ്ങളോ ഉണ്ടായിരുന്നില്ലെന്നും, യുവതി ആൺസുഹൃത്തുക്കളോടൊപ്പം പുറത്തുപോകുന്നത് ഇഷ്ടപ്പെടാത്തതിനെച്ചൊല്ലിയുള്ള തർക്കങ്ങളാണ് ദാരുണമായ സംഭവത്തിലേക്ക് നയിച്ചതെന്നും കൊല്ലപ്പെട്ട വിസ്മയയുടെ അമ്മ മാധ്യമങ്ങളോട് പറഞ്ഞു. ഭക്ഷണം കഴിച്ചതിനുശേഷം മുറിക്കകത്തു കയറിയ സമയത്താണ് അക്രമം നടന്നത്.
യുവതിയുടെ നിലവിളി കേട്ട് മുറിയുടെ അടുത്തെത്തിയെങ്കിലും വാതിൽ അകത്തുനിന്ന് പൂട്ടിയ നിലയിലായിരുന്നു. തുടർന്ന് വാതിൽ ചവിട്ടിത്തുറന്നാണ് അകത്തു കടന്നതെന്ന് ബന്ധു വെളിപ്പെടുത്തി. നാലര വയസുള്ള പിഞ്ചുകുഞ്ഞിനെപ്പോലും വെറുതെ വിടാതെ ഉപദ്രവിച്ചതാണ് തങ്ങളെ ഏറെ വേദനിപ്പിച്ചതെന്നും അവർ പറഞ്ഞു.
സുഹൃത്തുക്കളുമായി ബന്ധപ്പെട്ട വിഷയങ്ങളിൽ വീട്ടിൽ നേരത്തെയും വാക്കുതർക്കങ്ങൾ ഉണ്ടായിരുന്നുവെന്നും, ഇതിന്റെ തുടർച്ചയാണ് അക്രമത്തിൽ കലാശിച്ചതെന്നുമാണ് വിവരം. സംഭവത്തിൽ പോലീസ് അന്വേഷണം ഊർജിതമാക്കിയിട്ടുണ്ട്. വലപ്പാട് ബീച്ചിൽ താമസിക്കുന്ന വിസ്മയ, മകൻ ദക്ഷ് എന്നിവരാണ് കൊല്ലപ്പെട്ടത്. ഭാര്യയെയും മകനെയും കൊലപ്പെടുത്തി ആത്മഹത്യക്ക് ശ്രമിച്ച വിജേഷ് ഗുരുതരാവസ്ഥയിൽ ചികിത്സയിലാണ്
