കൊല്ലം: മദ്യപിച്ചെന്നെ പേരിൽ ഒരാളെ ബസിൽ കയറ്റാതിരിക്കാൻ കഴിയില്ലെന്ന് മന്ത്രി കെ.ബി. ഗണേഷ് കുമാർ. എന്നാൽ കെഎസ്ആർടിസി ബസിൽ മദ്യപിച്ച് കയറി അഭ്യാസം കാണിച്ചാൽ അത്തരക്കാരെ നേരെ അടുത്ത പോലീസ് സ്റ്റേഷനിൽ എത്തിക്കും. ഇതിന് ജീവനക്കാർക്ക് നിർദേശം നൽകിയിട്ടുണ്ടെന്നും മന്ത്രി പറഞ്ഞു.
‘‘രണ്ടെണ്ണം അടിച്ചാൽ അവിടെ മിണ്ടാതിരുന്നോളണം. അവിടെയിരുന്ന് യാത്ര ചെയ്യുന്നതിന് ഒരു വിരോധവുമില്ല. രണ്ടെണ്ണം അടിച്ചിട്ട് അടുത്തിരുന്ന സ്ത്രീകളെ ശല്യം ചെയ്യുക, അടുത്തിരിക്കുന്നവരുടെ തോളിലോട്ട് കിടന്നുറങ്ങുക, ഇങ്ങനെയൊക്കെയുണ്ടായാൽ കണ്ടക്ടറോട് വിവരം പറയുക. കണ്ടക്ടർ ബസ് നേരെ പോലീസ് സ്റ്റേഷനിലേക്ക് വിടും. വേറെ കുഴപ്പമൊന്നുമില്ല. മദ്യപിച്ചു എന്നതിന്റെ പേരിൽ ഇറക്കി വിടുകയൊന്നുമില്ല. അതുപോലെ ബസിൽ ബഹളം വയ്ക്കുക, കണ്ടക്ടറെ ചീത്ത പറയുക തുടങ്ങിയവ ഉണ്ടായാലും ബസ് നേരെ പൊലീസ് സ്റ്റേഷനിലേക്ക് കൊണ്ടുപോകാൻ അവർക്ക് അനുവാദം കൊടുത്തിട്ടുണ്ട്’’ – ഗണേഷ് കുമാർ പറഞ്ഞു.
