കൊച്ചി: മൂന്ന് പേർ കൊല്ലപ്പെട്ട നെടുമ്പാശ്ശേരി മിനി കൂപ്പർ വാഹനാപകടക്കേസിൽ പ്രതി സുഹൈൽ സജീവ് മദ്യപിച്ച മൂന്ന് ബാറുകൾക്കെതിരെ എക്സൈസ് കേസ് എടുത്തു. 19 വയസ്സുള്ള യുവാവിന് മദ്യം നൽകിയതിനാണ് നടപടി. എറണാകുളം എക്സൈസ് ഡെപ്യൂട്ടി കമ്മിഷണറുടെ നേതൃത്വത്തിലാണ് കേസെടുത്തത്. ബാറുകളുടെ ലൈസൻസ് റദ്ദാക്കുകയോ പിഴ ചുമത്തുകയോ ചെയ്തേക്കും.
അപകടസമയത്ത് കാറിന്റെ വേഗം എത്രയായിരുന്നുവെന്ന് കണ്ടെത്താൻ വാഹനത്തിലെ ഇവന്റ് ഡാറ്റാ റെക്കോർഡർ (ഇഡിആർ) പരിശോധിക്കും. അപകടത്തിന് തൊട്ടുമുമ്പ് ബ്രേക്ക് പ്രയോഗിച്ചിരുന്നോ, എത്രനേരം ആക്സിലറേറ്റർ അമർത്തിയിരുന്നു തുടങ്ങിയ വിവരങ്ങളും ഇതിലൂടെ ലഭിക്കും. ബിഎംഡബ്ല്യുവിൽനിന്നുള്ള സാങ്കേതിക വിദഗ്ധരെ എത്തിച്ച് പോലീസാണ് ഇഡിആർ വിവരങ്ങൾ ശേഖരിക്കുക.
കേസിലെ പ്രതിയായ സുഹൈൽ റിമാൻഡിലാണ്. കാറിലുണ്ടായിരുന്ന മറ്റ് മൂന്നുപേരെയും കസ്റ്റഡിയിലെടുത്തിട്ടുണ്ട്. ഇവർക്കെതിരെ പ്രേരണാക്കുറ്റം ചുമത്താനാണ് പോലീസിന്റെ നീക്കം. അപകടത്തിന് മുമ്പ് കാർ അമിതവേഗത്തിലായിരുന്നുവെന്ന് വ്യക്തമാക്കുന്ന സിസിടിവി ദൃശ്യങ്ങളും പോലീസ് ശേഖരിക്കും.
Related Post
സുഹൈലിന്റെ ഡ്രൈവിങ് ലൈസൻസ് റദ്ദാക്കുന്നതിനുള്ള നടപടികൾ മോട്ടോർ വാഹന വകുപ്പും ആരംഭിച്ചിട്ടുണ്ട്. അപകടസ്ഥലത്തെത്തിച്ച് തെളിവെടുപ്പ് നടത്തിയപ്പോഴാണ് കാർ അമിതവേഗത്തിലായിരുന്നുവെന്ന് സുഹൈൽ പോലീസിനോട് സമ്മതിച്ചതെന്നാണ് വിവരം. അപകടത്തിന്റെ കൂടുതൽ വിശദാംശങ്ങൾ കണ്ടെത്തുന്നതിനുള്ള അന്വേഷണം തുടരുകയാണ്.
