തിരുവനന്തപുരം: മത്സ്യത്തൊഴിലാളികൾ മത്സ്യബന്ധനത്തിനായി സൂക്ഷിച്ചിരുന്ന പെട്രോൾ മോഷ്ടിച്ച കേസിൽ യുവാവ് അറസ്റ്റിൽ. പള്ളിച്ചൽ സ്വദേശി അഭിജിത്ത് (24) ആണ് വിഴിഞ്ഞം പോലീസിന്റെ പിടിയിലായത്.
രണ്ടു ദിവസം മുൻപ് വിഴിഞ്ഞം ഫിഷ്‌ലാൻഡിലായിരുന്നു സംഭവം. മത്സ്യബന്ധനത്തിനായി കടലിലേക്ക് കൊണ്ടുപോകാൻ സൂക്ഷിച്ചിരുന്ന 30 ലിറ്റർ പെട്രോളാണ് പ്രതി ഓട്ടോറിക്ഷയിലെത്തി മോഷ്ടിച്ച് കടന്നുകളഞ്ഞത്.
പ്രദേശത്തെ സി.സി.ടി.വി. ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് പ്രതിയെ തിരിച്ചറിഞ്ഞത്. തുടർന്ന് ഇയാളെ പിടികൂടുകയായിരുന്നു. അറസ്റ്റിലായ പ്രതിക്കെതിരെ നിയമപരമായ തുടർനടപടികൾ സ്വീകരിച്ചതായി വിഴിഞ്ഞം പോലീസ് അറിയിച്ചു.
