കൊച്ചി: വൃക്കദാതാവും സ്വീകർത്താവും വ്യത്യസ്ത മതവിഭാഗങ്ങളിൽ ഉളളവരാണെന്ന കണ്ടെത്തലിൽ അവയവദാനത്തിനുള്ള സംയുക്ത അപേക്ഷ തളളി ജില്ലാ ഓതറൈസേഷൻ സമിതി. ഇരുവരും രണ്ടു മതക്കാരായതിനാൽ അപേക്ഷകരിൽ ആവശ്യമായ ‘സ്നേഹ ബന്ധം’ തെളിയിക്കപ്പെട്ടില്ലെന്ന വിലയിരുത്തലാണ് എറണാകുളം മെഡിക്കൽ കോളജ് പ്രിൻസിപ്പൽ അധ്യക്ഷനായ സമിതി റിപ്പോർട്ടിൽ രേഖപ്പെടുത്തിയിരിക്കുന്നത്.
എറണാകുളം പുത്തൻകുരിശ് സ്വദേശിയായ രോഗിക്ക് അമ്പലപ്പുഴ സ്വദേശിനി വൃക്ക നൽകാൻ സന്നദ്ധയായതിനെ തുടർന്നാണ് സംയുക്ത അപേക്ഷ സമർപ്പിച്ചത്. അപേക്ഷ നിരസിച്ച നടപടിക്കെതിരെ സംസ്ഥാനതല സമിതിയിൽ അപ്പീൽ നൽകാനാണ് അപേക്ഷകരുടെ തീരുമാനം. ഔദ്യോഗിക റിപ്പോർട്ടിൽ മതപരമായ പരാമർശങ്ങൾ ഉൾപ്പെടുത്തിയതിനെതിരെ സമൂഹത്തിൽ ആശങ്ക ഉയർത്തുന്നതാണെന്നും അവർ ആരോപിക്കുന്നു.
1994ലെ അവയവ കൈമാറ്റ നിയമം പ്രകാരം, രക്തബന്ധമോ അടുത്ത ബന്ധമോ ഇല്ലാത്തവർക്ക് പരോപകാരം അല്ലെങ്കിൽ സ്നേഹബന്ധത്തിന്റെ അടിസ്ഥാനത്തിൽ അവയവദാനം നടത്താം. ഇതിന് മുൻപ് ബന്ധപ്പെട്ട ഓതറൈസേഷൻ സമിതിയുടെ അനുമതി റിപ്പോർട്ട് നിർബന്ധമാണ്. ഈ നിയമ പ്രകാരം തന്നെ അപേക്ഷ സമർപ്പിച്ചിരുന്നതായി അപേക്ഷകർ വ്യക്തമാക്കുന്നു. കഴിഞ്ഞ 17ന് രോഗിയെയും ദാതാവിനെയും ബന്ധുക്കളെയും അഭിമുഖം നടത്തിയ ശേഷമാണ് സമിതി റിപ്പോർട്ട് തയ്യാറാക്കി അപേക്ഷ തള്ളിയത്.
സ്വീകർത്താവിന്റെ ഭാര്യയുമായി ആലപ്പുഴയിലെ ഒരു ധ്യാന കേന്ദ്രത്തിൽ ഉണ്ടായ പരിചയം പിന്നീട് അടുപ്പത്തിലേക്ക് മാറിയതിന്റെ അടിസ്ഥാനത്തിലാണ് വൃക്ക ദാനത്തിന് തയ്യാറായതെന്ന വിവരവും അപേക്ഷയിൽ ഉൾപ്പെടുത്തിയിരുന്നു. റിപ്പോർട്ടിൽ സ്വീകർത്താവും ഭാര്യയും ക്രൈസ്തവരാണെന്നും ദാതാവ് മുസ്ലിം സമൂഹത്തിൽപ്പെട്ടയാളാണെന്നും രേഖപ്പെടുത്തിയിരുന്നു. ഇത്തരത്തിലുള്ള സാഹചര്യത്തിൽ അവയവദാനത്തിന് ആവശ്യമായ സ്നേഹ ബന്ധം രൂപപ്പെടാൻ സാധ്യത കുറവാണെന്നാണ് സമിതിയുടെ വിലയിരുത്തൽ. കൂടാതെ, ഇരുവരുടെയും തൊഴിലും വരുമാനവും സംബന്ധിച്ച വിവരങ്ങളിൽ വ്യക്തതയില്ലെന്നും ബന്ധത്തെക്കുറിച്ചുള്ള പോലീസിന്റെ റിപ്പോർട്ട് അനുകൂലമല്ലെന്നും ചൂണ്ടിക്കാണിച്ചു. എന്നാൽ, പോലീസിന്റെ റിപ്പോർട്ട് തങ്ങളുടെ പക്ഷത്താണെന്നും അത് അവഗണിച്ചാണ് സമിതി തീരുമാനം എടുത്തതെന്നും അപേക്ഷകർ ആരോപിക്കുന്നു. അടുത്ത ബന്ധമില്ലാത്ത കേസുകളിൽ അപേക്ഷകൾ തള്ളപ്പെടുന്നത് സാധാരണ സംഭവമാണെന്നും അവർ കൂട്ടിച്ചേർത്തു.
