മോസ്കോ: റഷ്യൻ പ്രസിഡന്റ് വ്ലാഡിമിർ പുടിനും അമേരിക്കൻ പ്രസിഡന്റ് ഡൊണാൾഡ് ട്രംപും തമ്മിൽ ഏകദേശം 90 മിനിറ്റ് നീണ്ട ഫോൺ സംഭാഷണം നടത്തിയതായി റിപ്പോർട്ട്. സംഭാഷണത്തിനിടെ യുക്രൈനിൽ തുടരുന്ന യുദ്ധം അവസാനിപ്പിക്കാൻ അമേരിക്ക വീണ്ടും ഇടപെടാൻ തയ്യാറാണെന്ന് ട്രംപ് വ്യക്തമാക്കിയതായി റഷ്യൻ വിദേശകാര്യ മന്ത്രാലയം അറിയിച്ചു.
ഈ വർഷം ഇരുവരും തമ്മിലുള്ള നാലാമത്തെ ഫോൺ സംഭാഷണമാണിത്. തുർക്കിയിൽ അടുത്ത ദിവസങ്ങളിൽ ആരംഭിക്കാനിരിക്കുന്ന നിർണായക നാറ്റോ ഉച്ചകോടിക്ക് മുന്നോടിയായിട്ടാണ് ഈ ചർച്ച നടന്നത്. ട്രംപ് ഈ ഉച്ചകോടിയിൽ പങ്കെടുക്കുമെന്ന് പ്രതീക്ഷിക്കപ്പെടുന്നത്.
അതേസമയം അമേരിക്കയുടെ സ്വാതന്ത്ര്യപ്രഖ്യാപനത്തിന്റെ 250-ാം വാർഷികത്തോടനുബന്ധിച്ച് ട്രംപിനെയും അമേരിക്കൻ ജനങ്ങളെയും പുടിൻ അഭിനന്ദിച്ചതായി റഷ്യൻ വിദേശകാര്യ മന്ത്രാലയം അറിയിച്ചു. യുദ്ധം എത്രയും പെട്ടെന്ന് അവസാനിപ്പിക്കാൻ സഹായിക്കാമെന്ന തന്റെ സന്നദ്ധത ട്രംപ് വീണ്ടും ആവർത്തിച്ചതായും റിപ്പോർട്ടിൽ പറയുന്നു.
ക്രെംലിൻ സഹായിയായ യൂറി ഉഷാക്കോവിന്റെ വിശദീകരണമനുസരിച്ച്, നാറ്റോ ഉച്ചകോടിയിൽ പങ്കെടുക്കുന്നതിനോടനുബന്ധിച്ചാണ് ട്രംപ് സമാധാനശ്രമങ്ങളെക്കുറിച്ച് കൂടുതൽ സജീവമായി ഇടപെടാൻ താൽപര്യം പ്രകടിപ്പിച്ചത്. യുദ്ധം വേഗത്തിൽ അവസാനിപ്പിക്കാനും നിലവിലെ പ്രതിസന്ധിക്ക് പരിഹാരം കണ്ടെത്താനും അമേരിക്ക തയ്യാറാണെന്ന് ട്രംപ് വ്യക്തമാക്കിയതായി ഉഷാക്കോവ് പറഞ്ഞു.
അതേസമയം, റഷ്യയുടെ നിലപാട് വീണ്ടും ആവർത്തിച്ചുകൊണ്ട് ഉഷാക്കോവ് രാഷ്ട്രീയ-രാജതന്ത്രപരമായ പരിഹാരമാണ് മോസ്കോ ലക്ഷ്യമിടുന്നത് എന്ന് വ്യക്തമാക്കി. യുക്രൈനും അതിന്റെ യൂറോപ്യൻ കൂട്ടാളികളും യുദ്ധം നീട്ടാനും കൂടുതൽ ശക്തിപ്പെടുത്താനും ശ്രമിക്കുകയാണെന്നും, സാധാരണ പൗരന്മാരെ ലക്ഷ്യമിട്ടുള്ള ആക്രമണങ്ങൾ നടത്തുന്നതായും അദ്ദേഹം ആരോപിച്ചു.
സംഭാഷണത്തിനിടെ അമേരിക്കൻ പ്രതിനിധികളായ സ്റ്റീവ് വിറ്റ്കോഫും ജാരഡ് കുഷ്‌നറും സമാധാന ചർച്ചകൾക്ക് വേണ്ടി വീണ്ടും മോസ്കോ സന്ദർശിക്കാൻ തയ്യാറാണെന്ന് ട്രംപ് അറിയിച്ചതായും ഉഷാക്കോവ് പറഞ്ഞു. യുദ്ധം അവസാനിപ്പിക്കാൻ അന്താരാഷ്ട്ര തലത്തിൽ കൂടുതൽ സജീവമായ ഇടപെടലുകൾ ഉണ്ടാകാമെന്ന സൂചനയാണിത്. യുദ്ധഭൂമിയിലെ നിലവിലെ സാഹചര്യം സംബന്ധിച്ചും പുടിൻ വിശദീകരണം നൽകിയതായി റിപ്പോർട്ടുണ്ട്. റഷ്യൻ സേന സ്ഥിരതയാർന്ന മുന്നേറ്റം നടത്തുകയാണെന്നും, വിവിധ പ്രദേശങ്ങൾ കൈവശപ്പെടുത്തുന്നതായി അദ്ദേഹം അവകാശപ്പെട്ടു. കിഴക്കൻ യുക്രൈനിലെ തന്ത്രപ്രധാനമായ കോസ്റ്റിയാന്റിനിവ്ക നഗരം റഷ്യൻ സേന പിടിച്ചെടുത്തുവെന്ന വിവരവും റഷ്യൻ പക്ഷം മുന്നോട്ട് വച്ചു.
എന്നാൽ ഈ അവകാശവാദം യുക്രൈൻ പ്രസിഡന്റ് വ്ലാഡിമിർ സെലൻസ്കിയും യുക്രൈൻ സൈനിക ആസ്ഥാനവും തള്ളിക്കളഞ്ഞു. നഗരത്തിന്റെ നിയന്ത്രണം ഇപ്പോഴും യുക്രൈൻ സേനയ്ക്കാണെന്ന് അവർ വ്യക്തമാക്കി. ഇതിനിടെ, സെലൻസ്കിയും ട്രംപും ശനിയാഴ്ച ഒരു വളരെ നല്ല ഫോൺ സംഭാഷണം നടത്തിയതായി സെലൻസ്കി അറിയിച്ചു. “ഈ യുദ്ധം അവസാനിപ്പിക്കാൻ യാഥാർത്ഥ്യ സാധ്യതയുണ്ട്. അമേരിക്കയുടെ ഉറച്ച നിലപാട് അതിൽ നിർണായകമാണ്,” അദ്ദേഹം പറഞ്ഞു.
അതേസമയം യുക്രൈൻ യുദ്ധം തന്നെയാണ് തുർക്കിയിൽ നടക്കാനിരിക്കുന്ന നാറ്റോ ഉച്ചകോടിയുടെ പ്രധാന ചർച്ചാവിഷയമാകുമെന്ന് വിലയിരുത്തപ്പെടുന്നു. ലോക രാഷ്ട്രീയത്തിൽ നിർണായകമായ മാറ്റങ്ങൾക്ക് വഴിവയ്ക്കാവുന്ന ഈ ഉച്ചകോടിയിലേക്ക് അന്താരാഷ്ട്ര സമൂഹത്തിന്റെ ശ്രദ്ധ മുഴുവൻ കേന്ദ്രീകരിച്ചിരിക്കുകയാണ്.
