റിയാദ്: സൗദി അറേബ്യയുടെ തലസ്ഥാനമായ റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളത്തിന് നേരെ ഹൂതി മില്ലിഷ്യകൾ നടത്തിയ ആക്രമണത്തിൽ വൻ നാശനഷ്ടങ്ങളുണ്ടായതായി റിപ്പോർട്ട്. വിമാനത്തിൽ പ്രവേശിക്കാൻ തയ്യാറെടുക്കുകയായിരുന്ന ഉംറ തീർത്ഥാടകരെ ലക്ഷ്യമിട്ടാണ് ഞായറാഴ്ച ഉച്ചകഴിഞ്ഞ് ആക്രമണം നടത്തിയതെന്നാണ് റിപ്പോർട്ടുകൾ. പ്രാഥമിക വിവരങ്ങൾ പ്രകാരം ഒരു പാകിസ്ഥാൻ പൗരൻ കൊല്ലപ്പെടുകയും 11 പേർക്ക് പരിക്കേൽക്കുകയും ചെയ്തു.
ആക്രമണത്തെ ജനറൽ അതോറിറ്റി ഓഫ് സിവിലിയൻ ഏവിയേഷൻ ശക്തമായി അപലപിച്ചു. സ്ഫോടനത്തെത്തുടർന്ന് വിമാനത്താവളത്തിലുണ്ടായ നാശനഷ്ടങ്ങളുടെ വ്യാപ്തി വിലയിരുത്തുന്നതിനുള്ള നടപടികൾ അധികൃതർ ആരംഭിച്ചു. സുരക്ഷാ മുൻകരുതലുകളുടെ ഭാഗമായി വിമാനത്താവളത്തിന്റെ പ്രവർത്തനങ്ങളിലും തടസ്സങ്ങളുണ്ടായതായി റിപ്പോർട്ടുകൾ സൂചിപ്പിക്കുന്നു.
പരിക്കേറ്റവരെ ഉടൻതന്നെ സമീപത്തെ ആശുപത്രികളിലേക്ക് മാറ്റി അടിയന്തര ചികിത്സ ലഭ്യമാക്കി. പരിക്കേറ്റവരുടെ ആരോഗ്യനിലയും ചികിത്സാപുരോഗതിയും സൗദി ആരോഗ്യമന്ത്രി ഫഹദ് അൽ ജലാജൽ നേരിട്ട് വിലയിരുത്തിയതായും റിപ്പോർട്ടുണ്ട്.
Related Post
സിവിലിയൻ കേന്ദ്രങ്ങൾക്ക് നേരെയുള്ള ആക്രമണങ്ങൾക്കെതിരെ ശക്തമായ നടപടികൾ സ്വീകരിക്കുമെന്ന് സഖ്യസേന വ്യക്തമാക്കി. സംഭവത്തെത്തുടർന്ന് വിമാനത്താവളത്തിലും പരിസരപ്രദേശങ്ങളിലും സുരക്ഷ ശക്തമാക്കിയിട്ടുണ്ട്.
