തിരുവനന്തപുരം: കോഴിക്കോട് മെഡിക്കൽ കോളേജിൽ നിപ രോഗികൾക്ക് നൽകിയ റെംഡെസിവിർ മരുന്നിന്റെ കാലാവധി കഴിഞ്ഞിരുന്നോയെന്ന സംശയത്തിൽ അന്വേഷണം പ്രഖ്യാപിച്ച് ആരോഗ്യമന്ത്രി കെ. മുരളീധരൻ. 2021ൽ വാങ്ങിയ മരുന്നിന്റെ കാലാവധി 2023 മെയ് വരെ മാത്രമായിരുന്നെന്നും 2024ലും 2025ലും ഇത് ഉപയോഗിച്ചെന്നുമാണ് മന്ത്രിയുടെ വെളിപ്പെടുത്തൽ. മരുന്ന് ഉപയോഗിച്ചതാണോ നിപ ബാധിതരുടെ മരണത്തിന് കാരണമായതെന്ന് പരിശോധിക്കുമെന്നും ഇതിനായി മെഡിക്കൽ ബോർഡ് രൂപീകരിച്ചെന്നും മന്ത്രി നിയമസഭയിൽ അറിയിച്ചു.
2023 മെയ് 30ന് കാലാവധി അവസാനിച്ച മരുന്ന് അതിനുശേഷവും രോഗികൾക്ക് നൽകിയെന്നാണ് മന്ത്രിയുടെ നിയമസഭയിലെ രേഖാമൂലമുള്ള മറുപടി. 2024ലും 2025ലും ഈ മരുന്ന് ഉപയോഗിച്ചതായും മറുപടിയിൽ വ്യക്തമാക്കിയിട്ടുണ്ട്.
കാലാവധി കഴിഞ്ഞ മരുന്ന് നൽകിയതും രോഗികളുടെ മരണവും തമ്മിൽ ബന്ധമുണ്ടോയെന്ന കാര്യം പരിശോധനയിലൂടെ മാത്രമേ വ്യക്തമാകൂ. ഇതുൾപ്പെടെയുള്ള കാര്യങ്ങൾ പരിശോധിക്കാനാണ് മെഡിക്കൽ ബോർഡ് രൂപീകരിക്കുന്നത്. സംഭവത്തിൽ അന്വേഷണം പ്രഖ്യാപിച്ചിട്ടുമുണ്ട്.
