കൊച്ചി: സംസ്ഥാനത്ത് സ്വർണവില കുത്തനെ ഇടിയുന്നു. ശനിയാഴ്ച ഏഴുമാസത്തിനിടയിലെ ഏറ്റവും കുറഞ്ഞ നിരക്കിലെത്തി സ്വർണം. പവന് 2,480 രൂപ കുറഞ്ഞ് 1,01,840 രൂപയിലാണ് വ്യാപാരം നടന്നത്. ഗ്രാമിന് 310 രൂപ കുറഞ്ഞ് 12,730 രൂപയായി. രണ്ടുദിവസത്തിനിടെ പവൻവിലയിൽ 3,720 രൂപയുടെ ഇടിവാണുണ്ടായത്. വിലയിടിവ് തുടരുകയാണെങ്കിൽ പവൻവില ഒരു ലക്ഷം രൂപയ്ക്ക് താഴെയെത്താൻ ഇനി 1,840 രൂപയുടെ കുറവുകൂടി മതി.
സ്വർണവില വീണ്ടും ഒരു ലക്ഷം രൂപയ്ക്ക് താഴെയെത്തുമോയെന്നാണ് ഉപഭോക്താക്കൾ ഉറ്റുനോക്കുന്നത്. ഇതിനുമുൻപ് 2026 മാർച്ച് 23നാണ് പവൻവില ഒരു ലക്ഷം രൂപയ്ക്ക് താഴെയെത്തിയത്. അന്ന് 99,480 രൂപയായിരുന്നു വില. എന്നാൽ അന്നുതന്നെ വില തിരിച്ചുകയറി വ്യാപാരം അവസാനിക്കുമ്പോൾ 1,05,080 രൂപയിലെത്തി.
അന്താരാഷ്ട്ര വിപണിയിൽ സ്വർണവിലയിലുണ്ടായ ഇടിവാണ് ആഭ്യന്തര വിപണിയിലും പ്രതിഫലിക്കുന്നത്. ഒരു ട്രോയ് ഔൺസ് (31.1 ഗ്രാം) തനിത്തങ്കത്തിന്റെ വില 3,874 ഡോളറിലേക്ക് താഴ്ന്നു. അമേരിക്കൻ കേന്ദ്രബാങ്കായ ഫെഡറൽ റിസർവ് പലിശനിരക്ക് ഉയർത്തിയേക്കുമെന്ന വിലയിരുത്തലിനെ തുടർന്ന് നിക്ഷേപകർ ലാഭമെടുക്കലിലേക്ക് കടന്നതാണ് സ്വർണവിലയെ പ്രതികൂലമായി ബാധിച്ചതെന്നാണ് റിപ്പോർട്ടുകൾ.
പശ്ചിമേഷ്യൻ സംഘർഷത്തെത്തുടർന്ന് ക്രൂഡ് ഓയിൽ വില ഉയർന്നുനിൽക്കുന്നതും സ്വർണവിപണിയെ സ്വാധീനിക്കുന്നുണ്ട്. അതേസമയം, വെള്ളിവിലയിലും ഇടിവുണ്ടായി. ഗ്രാമിന് 10 രൂപ കുറഞ്ഞ് 200 രൂപയിലാണ് വെള്ളിയുടെ വ്യാപാരം.
