ഫ്ലോറിഡ: അമ്മയുടെ ഹാൻഡ്ബാഗിൽ സൂക്ഷിച്ചിരുന്ന തോക്ക് 4 വയസുകാരൻ പുറത്തെടുത്ത് അബദ്ധത്തിൽ മുഖത്ത് വെടിയേറ്റ് മരിച്ച സംഭവത്തിൽ മാസങ്ങൾക്കുശേഷം യുവതി അറസ്റ്റിൽ. മനറ്റി കൗണ്ടി ഷെരിഫ് ഓഫീസിലെ ഡെപ്യൂട്ടിമാർ സരസോട്ടയിലെ വീട്ടിലായിരുന്നു സംഭവം. 2026 ഓഗസ്റ്റ് 28ന് കോടതിയിൽ സമർപ്പിച്ച പ്രോബബിൾ കോസ് അഫിഡവിറ്റ് ഉദ്ധരിച്ച് പീപ്പിൾ ആണ് സംഭവത്തിന്റെ കൂടുതൽ വിവരങ്ങൾ റിപ്പോർട്ട് ചെയ്തത്.
മകന്റെ മരണത്തിൽ 29കാരിയായ ഡയമണ്ട് ഫിലിപ്സിനെയാണ് കേസിൽ അറസ്റ്റ് ചെയ്തത്. കോടതി രേഖകൾ പ്രകാരം 2026 സെപ്റ്റംബർ 22നായിരുന്നു അറസ്റ്റ്. ഫിലിപ്സിന്റെ മകൻ ജൂൺ 21നാണ് മരിച്ചത്. പ്രായപൂർത്തിയാകാത്ത കുട്ടിക്ക് എളുപ്പത്തിൽ ലഭ്യമാകുന്ന രീതിയിൽ തോക്ക് സൂക്ഷിച്ചതുമായി ബന്ധപ്പെട്ട കുറ്റമാണ് ഇവർക്കെതിരെ ചുമത്തിയിരിക്കുന്നത്. സെപ്റ്റംബർ 23ന് 10,000 ഡോളർ ജാമ്യത്തിൽ വിട്ടയച്ച ഫിലിപ്സ് നവംബർ 6ന് വീണ്ടും കോടതിയിൽ ഹാജരാകണം.
പ്രോബബിൾ കോസ് അഫിഡവിറ്റ് പ്രകാരം, അടുക്കളയിലെ ഐലൻഡിൽ വെച്ചിരുന്ന അമ്മയുടെ ബാഗ് എടുക്കുന്നതിനായി കുട്ടി അടുക്കളയിലെ സ്റ്റൂളിൽ കയറി. തുടർന്ന് പഴ്സിനുള്ളിൽ നിന്ന് .380 കാലിബർ സ്മിത്ത് ആൻഡ് വെസ്സൺ പിസ്റ്റൾ പുറത്തെടുത്ത കുട്ടി അബദ്ധത്തിൽ സ്വന്തം മുഖത്ത് വെടിയുതിർത്തെന്നാണ് ഡെപ്യൂട്ടിമാരുടെ ആരോപണം.
Related Post
ഫോറൻസിക് പരിശോധനയിലും പോസ്റ്റ്മോർട്ടം റിപ്പോർട്ടിലും സംഭവത്തെക്കുറിച്ച് കൂടുതൽ വിവരങ്ങൾ ലഭിച്ചു. തോക്ക് പൊട്ടിയ സമയത്ത് കുട്ടി തോക്കിന്റെ ബാരലിലേക്ക് താഴേക്ക് നോക്കുകയായിരുന്നിരിക്കാമെന്നാണ് പരിശോധനയിൽ സൂചന ലഭിച്ചത്. വെടിയുണ്ടയുടെ ഒരു ഭാഗം അടുക്കളയുടെ മേൽക്കൂരയിൽ നിന്ന് കണ്ടെത്തുകയും ചെയ്തു.
സംഭവസമയത്ത് കുട്ടിയുടെ മുത്തശ്ശിയും വീട്ടിലുണ്ടായിരുന്നു. വെടിയൊച്ച ഉണ്ടാകുന്നതിന് തൊട്ടുമുമ്പ് അടുക്കളയിൽ ഉണ്ടായിരുന്ന 4 വയസുകാരനോടും അവന്റെ 2 വയസുകാരനായ സഹോദരനോടും കൗണ്ടറിന് മുകളിൽ കയറരുതെന്ന് മുത്തശ്ശി പറഞ്ഞിരുന്നതായും അന്വേഷണ ഉദ്യോഗസ്ഥരോട് മൊഴി നൽകിയതായി അഫിഡവിറ്റിൽ പറയുന്നു.
തോക്ക് തന്റെ ബാഗിനുള്ളിലെ ചെറിയൊരു കമ്പാർട്ട്മെന്റിലാണ് സൂക്ഷിച്ചിരുന്നത്. സംഭവദിവസം പഴ്സ് അടുക്കളയിലെ ഐലൻഡിന്റെ മധ്യഭാഗത്താണ് വെച്ചത്. കുട്ടികൾക്ക് അവിടെ എത്താൻ കഴിയില്ലെന്നായിരുന്നു തന്റെ ധാരണ. അടുക്കളയിലെ സ്റ്റൂളിൽ കയറാനോ കൗണ്ടറിൽ ഇരുന്ന് ഭക്ഷണം കഴിക്കാനോ കുട്ടികളെ അനുവദിച്ചിരുന്നില്ലെന്നും ഫിലിപ്സ് അന്വേഷണ ഉദ്യോഗസ്ഥരോട് പറഞ്ഞു.
സാധാരണയായി തോക്ക് ബാഗിൻരെ താഴത്തെ സിപ്പ് ചെയ്ത കമ്പാർട്ട്മെന്റിലാണ് സൂക്ഷിച്ചിരുന്നതെന്നും, ഹോൾസ്റ്റർ ഉപയോഗിച്ചിരുന്നില്ലെന്നും ഫിലിപ്സ് പറഞ്ഞു. അധിക മാഗസിനും അതിനൊപ്പം സൂക്ഷിച്ചിരുന്നതായി അഫിഡവിറ്റിൽ പറയുന്നു. വീട്ടിൽ നിന്ന് പുറത്തുപോകുമ്പോൾ സുരക്ഷയ്ക്കായാണ് തോക്ക് കൈവശം വച്ചിരുന്നതെന്നും അവർ അന്വേഷണ ഉദ്യോഗസ്ഥരോട് പറഞ്ഞു.
എന്നാൽ സംഭവദിവസം ഐലൻഡിൽ വെച്ചിരുന്നപ്പോൾ തോക്ക് ലോഡ് ചെയ്ത നിലയിലായിരുന്നെന്നും മറ്റ് സുരക്ഷാ സംവിധാനങ്ങളൊന്നും ഉണ്ടായിരുന്നില്ലെന്നും ഫിലിപ്സ് മൊഴി നൽകിയതായി അഫിഡവിറ്റിൽ പറയുന്നു. ഈ സാഹചര്യമാണ് കുട്ടിക്ക് തോക്ക് ലഭ്യമായതുമായി ബന്ധപ്പെട്ട് പോലീസ് അന്വേഷണം നടത്താനും ഫിലിപ്സിനെതിരെ കുറ്റം ചുമത്താനും കാരണമായി.
