തലശ്ശേരി: കണ്ണൂർ തലശ്ശേരി എക്സൈസ് റേഞ്ച് ഓഫീസിൽ എക്സൈസ് അസി. ഇൻസ്പെക്ടർക്ക് മർദനമേറ്റു. സംഭവവുമായി ബന്ധപ്പെട്ട് പായം സ്വദേശി മുഹമ്മദ് കൈഫിനും കണ്ടാലറിയാവുന്ന മറ്റൊരാൾക്കുമെതിരെ പൊലീസ് കേസെടുത്തു. മുൻവൈരാഗ്യത്തിന്റെ പേരിലാണ് മർദിച്ചതെന്നാണ് പരാതി.
ഇന്നലെ ഉച്ചയ്ക്ക് രണ്ട് മണിയോടെയാണ് സംഭവം. പഴയ കേസിന്റെ വിശദാംശങ്ങൾ ആവശ്യപ്പെട്ട് എക്സൈസ് ഓഫീസിലെത്തിയ മുഹമ്മദ് കൈഫ്, ഉദ്യോഗസ്ഥനോട് വിവരങ്ങൾ എഴുതി നൽകാൻ ആവശ്യപ്പെടുകയായിരുന്നു. വിവരങ്ങൾ കൈമാറിയതിന് പിന്നാലെ മുൻ വൈരാഗ്യം മുൻനിർത്തി പ്രതിയും കൂടെയുണ്ടായിരുന്നയാളും ചേർന്ന് അസിസ്റ്റന്റ് ഇൻസ്പെക്ടറെ ആക്രമിക്കുകയായിരുന്നുവെന്ന് എഫ്ഐആറിൽ പറയുന്നു.
മർദനത്തിൽ എക്സൈസ് ഉദ്യോഗസ്ഥന്റെ തലയ്ക്കും കൈയ്ക്കും പരിക്കേറ്റിട്ടുണ്ട്. പൊലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.
