ലിസ്ബൺ: അന്താരാഷ്ട്ര ഫുട്‌ബോളിൽനിന്നുള്ള വിരമിക്കൽ തീരുമാനം പോർച്ചുഗൽ പരിശീലകൻ ഹോർഹെ ജീസസിനെ അറിയിക്കാതെയാണ് സൂപ്പർ താരം ക്രിസ്റ്റ്യാനോ റൊണാൾഡോ പ്രഖ്യാപിച്ചതെന്ന് റിപ്പോർട്ട്. പരിശീലകനെ മുൻകൂട്ടി വിവരമറിയിക്കാതെയായിരുന്നു റൊണാൾഡോയുടെ പ്രഖ്യാപനമെന്നാണ് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്. സെപ്റ്റംബർ 30-നുശേഷം ഇരുവരും തമ്മിൽ യാതൊരുവിധ ആശയവിനിമയവും നടന്നിട്ടില്ലെന്നും റിപ്പോർട്ടിലുണ്ട്.
പോർച്ചുഗീസ് ഫുട്‌ബോൾ ഫെഡറേഷൻ പ്രസിഡന്റ് പെഡ്രോ പ്രോൻസയോടാണ് റൊണാൾഡോ വിരമിക്കൽ തീരുമാനം അറിയിച്ചത്. ഹോർഹെ ജീസസിനു കീഴിൽ ഇനി കളിക്കാൻ താത്പര്യമില്ലാത്തതാണ് പരിശീലകനെ അറിയിക്കാതിരുന്നതിന് പിന്നിലെന്നാണ് റിപ്പോർട്ടുകൾ. വരാനിരിക്കുന്ന മത്സരങ്ങൾക്കുള്ള ടീമിൽ ഇടംപിടിക്കുന്നത് ഒഴിവാക്കാൻ സ്‌ക്വാഡ് പ്രഖ്യാപനത്തിന് തൊട്ടുമുമ്പാണ് വിരമിക്കൽ തീരുമാനം പുറത്തുവിട്ടതെന്നും സൂചനയുണ്ട്.
റൊണാൾഡോയെ വീണ്ടും ദേശീയ ടീമിലെടുക്കാൻ പദ്ധതിയിട്ടിരുന്ന ജീസസിന് ഈ പ്രഖ്യാപനം അപ്രതീക്ഷിത തിരിച്ചടിയായി. ഒരുകാലത്ത് തന്റെ പ്രിയപ്പെട്ട പരിശീലകനെന്ന് റൊണാൾഡോ വിശേഷിപ്പിച്ചിരുന്ന ജീസസ് ഇന്ന് താരത്തിന്റെ ഫുട്‌ബോൾ ജീവിതത്തിലെ വലിയ വിവാദത്തിന്റെ കേന്ദ്രത്തിലാണ്. സൗദി അറേബ്യയിലെ അൽ നസറിൽ തുടങ്ങിയ സൗഹൃദം പോർച്ചുഗൽ ദേശീയ ടീമിലും തുടരുമെന്ന് കരുതിയിരിക്കെയാണ് ഇരുവരും തമ്മിലുള്ള ബന്ധം വഷളായത്. ഒരു മത്സരത്തിൽ കളിക്കാൻ അവസരം ലഭിക്കാതിരുന്നതിൽ തുടങ്ങിയ അസ്വാരസ്യം, പരിശീലകൻ വാക്കുപാലിച്ചില്ലെന്ന ആരോപണത്തിലേക്കും ദേശീയ ടീമിന്റെ ക്യാമ്പിൽനിന്നുള്ള റൊണാൾഡോയുടെ മടങ്ങിപ്പോക്കിലേക്കും വളർന്നു. ഒടുവിൽ പോർച്ചുഗീസ് ഫുട്‌ബോൾ ഫെഡറേഷന്റെ അച്ചടക്ക നടപടിയിലുമെത്തി.
റൊണാൾഡോയും ജീസസും തമ്മിലുള്ള ബന്ധം കേവലം താരവും പരിശീലകനും തമ്മിലുള്ള ഔദ്യോഗിക ബന്ധമായിരുന്നില്ല. സൗദി ക്ലബ്ബായ അൽ നസറിൽ ഒരുമിച്ച് പ്രവർത്തിച്ച കാലത്ത് ഇരുവരും അടുത്ത സൗഹൃദത്തിലായിരുന്നു. ജീസസിന്റെ പരിശീലനരീതികളിലും തീരുമാനങ്ങളിലുമുള്ള വിശ്വാസം റൊണാൾഡോ പരസ്യമായി പ്രകടിപ്പിക്കുകയും ചെയ്തിരുന്നു.
2026 ലോകകപ്പിൽ പോർച്ചുഗൽ പ്രീക്വാർട്ടറിൽ പുറത്തായതോടെ പരിശീലകൻ റോബർട്ടോ മാർട്ടിനെസിന് പകരക്കാരനെ കണ്ടെത്തേണ്ട സാഹചര്യമുണ്ടായി. ദേശീയ ടീമിന്റെ പരിശീലകസ്ഥാനത്തേക്ക് ഹോർഹെ ജീസസിന്റെ പേര് ഉയർന്നപ്പോൾ അദ്ദേഹത്തെ പിന്തുണച്ചവരിൽ റൊണാൾഡോയുമുണ്ടായിരുന്നു.
പോർച്ചുഗീസ് ഫുട്‌ബോൾ ഫെഡറേഷൻ പ്രസിഡന്റ് പെഡ്രോ പ്രോൻസ അഭിപ്രായം ചോദിച്ചപ്പോൾ ജീസസായിരിക്കും ശരിയായ തിരഞ്ഞെടുപ്പെന്ന് അറിയിച്ചതായി റൊണാൾഡോ പിന്നീട് വെളിപ്പെടുത്തി. ജീസസിനെ പരിശീലകനായി നിയമിച്ചപ്പോൾ താൻ സന്തോഷവാനായിരുന്നെന്നും താരം വ്യക്തമാക്കിയിരുന്നു.
2026 സെപ്റ്റംബർ 27. യുവേഫ നേഷൻസ് ലീഗിൽ നോർവേയെ നേരിടാനിറങ്ങിയ പോർച്ചുഗൽ ടീമിൽ റൊണാൾഡോ പകരക്കാരുടെ ബെഞ്ചിലായിരുന്നു. താരത്തിന്റെ പ്രായവും ശാരീരികക്ഷമതയും പരിഗണിച്ച് കളിസമയം നിയന്ത്രിക്കാൻ പരിശീലകൻ പ്രത്യേക പദ്ധതി തയ്യാറാക്കിയിരുന്നു. വെയിൽസ്, നോർവേ, ഡെൻമാർക്ക്, വീണ്ടും നോർവേ എന്നീ മത്സരങ്ങളടങ്ങിയ പരമ്പരയിൽ ആദ്യത്തെയും അവസാനത്തെയും മത്സരങ്ങളിൽ റൊണാൾഡോയെ കളിപ്പിക്കാനായിരുന്നു ധാരണയെന്നാണ് താരം പറയുന്നത്.
എന്നാൽ നോർവേക്കെതിരായ മത്സരദിവസം തീരുമാനം മാറി. രണ്ടാം പകുതിയിൽ ഏകദേശം 30 മിനിറ്റ് കളിക്കാൻ അവസരം നൽകാമെന്ന് ജീസസ് അറിയിച്ചതായാണ് റൊണാൾഡോയുടെ വാദം. ആദ്യപകുതി അവസാനിച്ചതുമുതൽ താരം വാംഅപ്പ് ആരംഭിച്ചെങ്കിലും മത്സരം തീരുന്നതുവരെ കളത്തിലിറക്കിയില്ല. പോർച്ചുഗൽ 2-1ന് വിജയിച്ചെങ്കിലും ബെഞ്ചിലിരുന്ന റൊണാൾഡോയുടെ നിരാശ പ്രകടമായിരുന്നു.
മത്സരത്തിന്റെ സാഹചര്യം മാറിയതിനാലാണ് താരത്തെ കളത്തിലിറക്കാതിരുന്നതെന്നായിരുന്നു ജീസസിന്റെ വിശദീകരണം. എന്നാൽ, വാഗ്ദാനം ചെയ്ത അവസരം നിഷേധിക്കപ്പെട്ടതായാണ് റൊണാൾഡോ ഇതിനെ കണ്ടത്. ഒരു താരത്തെ ബെഞ്ചിലിരുത്താനുള്ള പരിശീലകന്റെ അധികാരമല്ല, നൽകിയ വാക്ക് പാലിക്കാതിരുന്നതാണ് പ്രശ്‌നമെന്ന നിലപാടിലായിരുന്നു റൊണാൾഡോ.
നോർവേ മത്സരത്തിനുശേഷം ഇരുവരും തമ്മിലുള്ള അസ്വാരസ്യം പരിഹരിക്കാൻ ശ്രമമുണ്ടായി. ജീസസ്, റൊണാൾഡോ, അൽ നസർ സ്പോർട്ടിങ് ഡയറക്ടർ സിമാവോ കുട്ടീഞ്ഞോ, റൊണാൾഡോയുടെ ഉപദേഷ്ടാവ് തിയാഗോ ക്രവെയ്റോ എന്നിവർ പങ്കെടുത്ത ചർച്ചയും നടന്നു.
ചർച്ചയിലൂടെ തർക്കം പരിഹരിക്കാനും മാധ്യമങ്ങൾക്ക് മുന്നിൽ കാര്യങ്ങൾ വ്യക്തമാക്കാനും ധാരണയായെന്നാണ് റൊണാൾഡോയുടെ വാദം. ഇതിനായി എട്ട് കാര്യങ്ങളടങ്ങിയ രേഖ തയ്യാറാക്കിയെന്നും താരം അവകാശപ്പെട്ടു. ദേശീയ ടീമിലെ തന്റെ കളിസമയം നിശ്ചയിക്കേണ്ടത് പരിശീലകനാണെന്നും കളിക്കാൻ അവസരം നൽകണമെന്ന് താൻ ആവശ്യപ്പെട്ടിട്ടില്ലെന്നും ജീസസിന്റെ തീരുമാനങ്ങളെ ബഹുമാനിച്ചിരുന്നുവെന്നും വ്യക്തമാക്കുന്നതായിരുന്നു രേഖയിലെ പ്രധാന കാര്യങ്ങൾ.
ദീർഘനേരം വാംഅപ്പ് ചെയ്യിച്ചശേഷം കളത്തിലിറക്കാതിരുന്നത് തെറ്റായിപ്പോയെന്ന് പരിശീലകൻ സമ്മതിക്കണമെന്നും രേഖയിൽ ഉൾപ്പെടുത്തിയിരുന്നു. എന്നാൽ, ജീസസ് പരസ്യമായി മാപ്പുപറയണമെന്ന് താൻ ആവശ്യപ്പെട്ടിരുന്നില്ലെന്ന് റൊണാൾഡോ വ്യക്തമാക്കി.
ചർച്ചയുടെ അവസാനം ജീസസ് തന്നെ ആലിംഗനം ചെയ്തെന്നും ധാരണപ്രകാരമുള്ള വിശദീകരണം നൽകുമെന്ന് ഉറപ്പുനൽകിയെന്നും താരം പറയുന്നു. എന്നാൽ ഡെൻമാർക്കിനെതിരായ മത്സരത്തിന് മുന്നോടിയായുള്ള വാർത്താസമ്മേളനത്തിൽ ജീസസ് നടത്തിയ പരാമർശങ്ങൾ ധാരണയ്ക്ക് വിരുദ്ധമായിരുന്നെന്നാണ് റൊണാൾഡോയുടെ ആരോപണം. പരിശീലകൻ രണ്ടാംതവണയും വാക്ക് ലംഘിച്ചുവെന്നും താരം ആരോപിച്ചു.
താരങ്ങളെ തിരഞ്ഞെടുക്കാനുള്ള അധികാരം പൂർണമായും പരിശീലകനാണെന്ന നിലപാടിലായിരുന്നു ജീസസ്. റൊണാൾഡോയുടെ മഹത്വം അംഗീകരിക്കുമ്പോഴും ടീമിലെ നിയമങ്ങൾ എല്ലാവർക്കും ഒരുപോലെയാണെന്ന് അദ്ദേഹം വ്യക്തമാക്കി. നോർവേക്കെതിരായ മത്സരത്തിൽ റൊണാൾഡോയെ കളിപ്പിക്കാൻ ആലോചിച്ചിരുന്നെങ്കിലും മത്സരസാഹചര്യം മാറിയതോടെ തീരുമാനം മാറ്റേണ്ടിവന്നെന്നും വിശദീകരിച്ചു.
റൊണാൾഡോയുമായി വ്യക്തിപരമായ പ്രശ്‌നങ്ങളൊന്നുമില്ലെന്നും അദ്ദേഹം പറഞ്ഞു. ഒരു വർഷത്തെ സൗഹൃദം ഇത്തരമൊരു സംഭവത്തിന്റെ പേരിൽ അവസാനിപ്പിക്കാനാവില്ലെന്നായിരുന്നു ജീസസിന്റെ പ്രതികരണം. റൊണാൾഡോയ്ക്ക് ദേശീയ ടീമിലേക്ക് തിരിച്ചുവരാമെന്നും അദ്ദേഹം വ്യക്തമാക്കി. അതേസമയം, പരിശീലകനെന്ന നിലയിലുള്ള തന്റെ അധികാരത്തിൽ വിട്ടുവീഴ്ച ചെയ്യില്ലെന്ന നിലപാടും സ്വീകരിച്ചു.
ഇതിനുപിന്നാലെ സെപ്റ്റംബർ 30-ന് ഡെൻമാർക്കിലെ കോപ്പൻഹേഗനിൽ പോർച്ചുഗൽ ദേശീയ ടീമിന്റെ പരിശീലന ക്യാമ്പിൽനിന്ന് റൊണാൾഡോ അപ്രതീക്ഷിതമായി മടങ്ങി. പരിശീലകന്റെ വാർത്താസമ്മേളനത്തിനുശേഷമായിരുന്നു നടപടി.
ഒക്ടോബർ ആറിന് പുറത്തിറക്കിയ ദീർഘമായ പ്രസ്താവനയിൽ ജീസസ് രണ്ടുതവണ വാക്ക് ലംഘിച്ചതായി റൊണാൾഡോ ആരോപിച്ചു. സഹതാരങ്ങളോടും പോർച്ചുഗീസ് ജനതയോടും ക്യാമ്പ് വിട്ടതിന് ക്ഷമ ചോദിച്ച താരം, തന്റെ നടപടിക്ക് അച്ചടക്കശിക്ഷ ലഭിക്കണമെന്ന നിലപാടും സ്വീകരിച്ചു.
ഒക്ടോബർ 20-ന് പോർച്ചുഗീസ് ഫുട്‌ബോൾ ഫെഡറേഷൻ റൊണാൾഡോയ്ക്ക് 30 ദിവസത്തെ സസ്‌പെൻഷനും 255 യൂറോ പിഴയും വിധിച്ചു. സെപ്റ്റംബർ 30 മുതൽ ശിക്ഷ പ്രാബല്യത്തിലായതിനാൽ നവംബറിലെ മത്സരങ്ങൾക്കുമുമ്പ് വിലക്ക് അവസാനിക്കുമെന്നായിരുന്നു റിപ്പോർട്ടുകൾ. എന്നാൽ, നവംബർ അഞ്ചിന് എല്ലാവരെയും ഞെട്ടിച്ചുകൊണ്ട് റൊണാൾഡോ വിരമിക്കൽ തീരുമാനം പ്രഖ്യാപിക്കുകയായിരുന്നു.
