കൊല്ലം: സ്വകാര്യ വിമാനയാത്ര നടത്തിയ മുഖ്യമന്ത്രി വി.ഡി. സതീശനും സ്വകാര്യ വാഹനം ഉപയോഗിച്ചതുമായി ബന്ധപ്പെട്ട് വിവാദത്തിലായ മന്ത്രി കെ.എം. ഷാജിയും രാജിവയ്ക്കണമെന്ന് സി.പി.എം സംസ്ഥാന സെക്രട്ടേറിയറ്റ് അംഗം പി. ജയരാജൻ. സത്യപ്രതിജ്ഞാ ലംഘനം നടത്തിയ മുഖ്യമന്ത്രിയും മന്ത്രിയും അധികാരത്തിൽ തുടരാൻ പാടില്ലെന്ന് അദ്ദേഹം പറഞ്ഞു.
സ്വകാര്യ കമ്പനി നടത്തുന്നതുപോലെയാണ് സംസ്ഥാന ഭരണം നടത്തുന്നതെന്നും പി. ജയരാജൻ ആരോപിച്ചു. മുഖ്യമന്ത്രിയുടെ ചാർട്ടേഡ് വിമാനയാത്രയുടെ ചെലവ് വഹിച്ചത് ആരാണെന്ന് വ്യക്തമാക്കണമെന്നും അദ്ദേഹം ആവശ്യപ്പെട്ടു. സ്പോൺസർ ആരാണെന്ന് പറയില്ലെന്ന മുഖ്യമന്ത്രിയുടെ നിലപാട് അംഗീകരിക്കാനാകില്ലെന്നും ഇക്കാര്യം അറിയാനുള്ള അവകാശം ജനങ്ങൾക്കുണ്ടെന്നും ജയരാജൻ പറഞ്ഞു. സ്പോൺസർഷിപ്പ് സ്വീകരിക്കുന്നതിന് അനുമതി വേണമെന്നും അദ്ദേഹം ആവശ്യപ്പെട്ടു.
മന്ത്രി കെ.എം. ഷാജിയുടെ സ്വകാര്യ റേഞ്ച് റോവർ ഉപയോഗവുമായി ബന്ധപ്പെട്ട വിവാദത്തിലും പി. ജയരാജൻ വിമർശനം ഉന്നയിച്ചു. സ്വകാര്യ വാഹനം ഔദ്യോഗിക ആവശ്യത്തിന് ഉപയോഗിച്ചതുമായി ബന്ധപ്പെട്ട് സർക്കാർ അനുമതിയുടെ കാര്യത്തിൽ വിവാദം തുടരുന്നതിനിടെയാണ് ജയരാജന്റെ പ്രതികരണം.
മുഖ്യമന്ത്രി മാധ്യമങ്ങളോട് ‘മാറിനിൽക്ക്’ എന്ന് പറഞ്ഞ സംഭവത്തിലും പി. ജയരാജൻ പ്രതികരിച്ചു. നേരത്തെ പിണറായി വിജയൻ മാധ്യമങ്ങളോട് സ്വീകരിച്ച നിലപാടുകളെക്കുറിച്ച് വ്യാപകമായി വിമർശനം ഉന്നയിച്ചവരാണ് ഇപ്പോൾ വി.ഡി. സതീശന്റെ പ്രതികരണത്തെ ചോദ്യം ചെയ്യുന്നതെന്നും അദ്ദേഹം പറഞ്ഞു.
ഒരു യോഗത്തിൽ മാധ്യമങ്ങൾക്ക് പ്രവേശനം നിഷേധിച്ചതിന്റെ പേരിൽ പിണറായി വിജയനെതിരെ വലിയ വിമർശനം ഉയർന്നിരുന്നു. എന്നാൽ ഇപ്പോൾ ചോദ്യം ചോദിച്ച മാധ്യമപ്രവർത്തകരോട് ‘മാറിനിൽക്ക്’ എന്നാണ് മുഖ്യമന്ത്രി പറയുന്നത്. ഇത് മാധ്യമങ്ങളെ ആക്ഷേപിക്കുന്ന സമീപനമാണെന്നും മുഖ്യമന്ത്രിയുടേത് ധിക്കാരപരമായ നിലപാടാണെന്നും പി. ജയരാജൻ ആരോപിച്ചു.
