ഇസ്ലാമാബാദ്: പാകിസ്ഥാനില്‍ താലിബാന്‍ അനുകൂലികള്‍ താമസിച്ച സ്ഥലത്ത് അജ്ഞാതര്‍ നടത്തിയ ബോംബ് ആക്രമണത്തില്‍ അഞ്ച് പേര്‍ മരിച്ചു. നിരവധിപേര്‍ക്ക് പരിക്ക്. വടക്കുപടിഞ്ഞാറന്‍ പാക്കിസ്ഥാനിലെ ഖൈബര്‍ പഖ്തൂണ്‍ഖ്വ പ്രവിശ്യയിലെ മതപഠനശാലയിലുള്ള പള്ളിയില്‍ വെള്ളിയാഴ്ച ജുമാ നമസ്‌ക്കാരത്തിനിടെയാണ് ചാവേര്‍ ബോംബ് പൊട്ടിത്തെറിച്ച് 5 പേര്‍ കൊല്ലപ്പെട്ടത്. റമദാന്‍ വ്രതം ആരംഭിക്കുന്നതിന് തൊട്ടുമുമ്പാണ് ആക്രമണമുണ്ടായതെന്നാണ് വിവരം. ആക്രമണത്തിന്റെ ഉത്തരവാദിത്തം നിലവില്‍ ആരും ഏറ്റെടുത്തിട്ടില്ല. പരുക്കേറ്റ ഇരുപതോളം പേരെ വിവിധം ആശുപത്രികളില്‍ പ്രവേശിപ്പിച്ചു.
1947ല്‍ മൗലാന അബ്ദുല്‍ ഹഖ് ഹഖാനി സ്ഥാപിച്ച മദ്‌റസയാണ് സ്‌ഫോടനത്തില്‍ തകര്‍ന്നത്. താലിബാന്‍ അനുകൂല മതപഠനശാലയാണിതെന്നാണ് വിവരങ്ങള്‍. മതപുരോഹിതന്‍ ഉള്‍പ്പെടെയുള്ളവര്‍ മരിച്ചതായാണ് റിപ്പോര്‍ട്ട്. ചാവേര്‍ സ്‌ഫോടനത്തില്‍ പാകിസ്താന്‍ പ്രധാനമന്ത്രി ശഹബാസ് ശരീഫ് അപലപിച്ചു.
ജിഹാദ് യൂണിവേഴ്‌സിറ്റി എന്നാണ് ഈ മതപഠനശാല അറിയപ്പെടുന്നത്. കടുത്ത താലിബാന്‍ അനുകൂലികളാണ് ഇവിടെ കഴിയുന്നത്. ഏകദേശം നാലായിരത്തോളം വിദ്യാര്‍ത്ഥികള്‍ പഠിക്കുന്ന ഇടം കൂടിയാണിത്. ഏതാനും വിദ്യാര്‍ഥികള്‍ക്ക് പാക് മുന്‍ പ്രധാനമന്ത്രി ബേനസീര്‍ ഭുട്ടോയുടെ വധശ്രമത്തില്‍ പങ്കുണ്ടെന്ന് ആരോപണമുയര്‍ന്നതിന് പിന്നാലെ ഇവിടം നിരീക്ഷണത്തിലായിരുന്നു.
