ന്യൂഡൽഹി: എംപി ശശി തരൂരിനെ തമാശ രൂപത്തിൽ ഉപദേശിച്ച് കോൺഗ്രസ് അധ്യക്ഷൻ മല്ലികാർജുൻ ഖാർഗെ. മഹാത്മാഗാന്ധിയുടെ ജന്മവാർഷികത്തോടനുബന്ധിച്ചുള്ള പരിപാടിയിൽ തരൂർ പങ്കെടുക്കണമെന്നും, പത്രങ്ങളിൽ ലേഖനങ്ങൾ എഴുതുന്നതിൽ മാത്രം ഒതുങ്ങരുതെന്നുമാണ് ഖാർഗെ പറഞ്ഞതെന്ന് യോഗവുമായി ബന്ധപ്പെട്ട വൃത്തങ്ങളെ ഉദ്ധരിച്ച് റിപ്പോർട്ടുകൾ പറയുന്നു. കോൺഗ്രസ് വർക്കിങ് കമ്മിറ്റി യോഗത്തിലായിരുന്നു തരൂരിനുള്ള ഉപദേശം.
അതേസമം നാല് തവണ എംപിയും കോൺഗ്രസിന്റെ പ്രമുഖ മുഖങ്ങളിലൊരാളുമായ ശശി തരൂരും പാർട്ടി നേതൃത്വവും തമ്മിലുള്ള ബന്ധം ചില ഘട്ടങ്ങളിൽ അസ്വസ്ഥതകൾക്ക് ഇടയാക്കിയിട്ടുണ്ട്. പ്രത്യേകിച്ചും പ്രധാനമന്ത്രി നരേന്ദ്ര മോദിയുമായി ബന്ധപ്പെട്ട ചില വിഷയങ്ങളിൽ തരൂർ സ്വീകരിച്ച നിലപാടുകളിൽ. കഴിഞ്ഞ വർഷം നടന്ന ‘ഓപ്പറേഷൻ സിന്ദൂർ’ക്ക് പിന്നാലെ ഇത്തരമൊരു സാഹചര്യം ഉണ്ടായിരുന്നു. ഇക്കാര്യത്തിൽ പാർട്ടിക്കുള്ളിൽനിന്ന് എതിർപ്പുകൾ ഉയർന്നിരുന്നെങ്കിലും, ഇന്ത്യയിലെ ഭീകരാക്രമണങ്ങളിൽ പാക്കിസ്ഥാന്റെ പങ്ക് അന്താരാഷ്ട്ര തലത്തിൽ ചൂണ്ടിക്കാട്ടുന്നതിനായി വിദേശത്തേക്ക് പോയ ഏഴ് പ്രതിനിധി സംഘങ്ങളിൽ ഒന്നിന് തരൂർ നേതൃത്വം നൽകിയിരുന്നു.
അതേ വർഷം തന്നെ ‘കുടുംബാധിപത്യ രാഷ്ട്രീയം’ സംബന്ധിച്ച് തരൂർ എഴുതിയ ലേഖനവും കോൺഗ്രസിനുള്ളിൽ ചർച്ചകൾക്ക് വഴിവെച്ചിരുന്നു. ബിജെപി പലപ്പോഴും കോൺഗ്രസിനെയും നെഹ്റു- ഗാന്ധി കുടുംബത്തെയും വിമർശിക്കാൻ ഉന്നയിക്കുന്ന വിഷയമാണ് കുടുംബാധിപത്യ രാഷ്ട്രീയം. അതുപോലെ ചൊവ്വാഴ്ച ചേർന്ന കോൺഗ്രസ് വർക്കിങ് കമ്മിറ്റി യോഗത്തിൽ കോൺഗ്രസോ, പ്രതിപക്ഷമായ ഇന്ത്യ സഖ്യമോ എപ്പോൾ റാലി സംഘടിപ്പിക്കണമെന്നതിനെക്കുറിച്ച് ചർച്ചയും നടന്നു. ഒക്ടോബർ 2, മഹാത്മാഗാന്ധിയുടെ ജന്മവാർഷിക ദിനത്തിൽ റാലി നടത്താമെന്ന് തരൂർ നിർദേശിച്ചു.
ഇതിന് പിന്നാലെയാണ് ഖാർഗെ തരൂരിനെ നോക്കി തമാശരൂപത്തിൽ പ്രതികരിച്ചതെന്നാണ് വൃത്തങ്ങൾ പറയുന്നത്. “നിങ്ങൾ അതിൽ പങ്കെടുക്കണം. പിന്നീട് ഞങ്ങൾ വായിക്കുന്ന പത്രലേഖനങ്ങൾ എഴുതുന്നതിൽ മാത്രം ഒതുങ്ങരുത്” എന്നായിരുന്നു ഖാർഗെയുടെ പരാമർശം. തരൂർ ഇതിന് മറുപടി പറയാതെ തലയാട്ടി സമ്മതം അറിയിച്ചതായും റിപ്പോർട്ടുണ്ട്.
അതേസമയം യോഗത്തിൽ ഖാർഗെയും രാഹുൽ ഗാന്ധിയും തമ്മിലും സമാനമായൊരു തമാശയുണ്ടായതായി വൃത്തങ്ങൾ പറയുന്നു. കോൺഗ്രസ് മുഴുവൻ രാഹുൽ ഗാന്ധിക്കു പിന്നിലുണ്ടെന്നും ആശങ്കപ്പെടേണ്ടതില്ലെന്നും ഖാർഗെ പറഞ്ഞപ്പോൾ, “പിന്നിൽ നിൽക്കുന്നത് കുഴപ്പമില്ല, പക്ഷേ വളരെ പിന്നിലാകാതിരിക്കട്ടെ” എന്നായിരുന്നു രാഹുൽ ഗാന്ധിയുടെ തമാശയോടെയുള്ള പ്രതികരണം.
വോട്ട് മോഷണം സംബന്ധിച്ച് താൻ നേരത്തെ ഉന്നയിച്ച ആരോപണങ്ങളെക്കുറിച്ചും രാഹുൽ യോഗത്തിൽ സംസാരിച്ചു. മുൻകാലത്ത് താൻ ഇത്തരം ആരോപണങ്ങൾ ഉന്നയിക്കുമ്പോൾ പലരും സംശയത്തോടെയാണ് കണ്ടിരുന്നതെന്നും ഇപ്പോൾ ആ സ്ഥിതി മാറിയിട്ടുണ്ടെന്നും അദ്ദേഹം പറഞ്ഞു.
മുമ്പ് ഏകദേശം 20 ശതമാനം ആളുകൾ മാത്രമാണ് തന്റെ ആരോപണങ്ങൾ വിശ്വസിച്ചിരുന്നതെങ്കിൽ ഇപ്പോൾ അത് 80 ശതമാനമായി ഉയർന്നിട്ടുണ്ടെന്നാണ് രാഹുൽ യോഗത്തിൽ പറഞ്ഞു. യോഗത്തിൽ പങ്കെടുത്ത ചിലർക്കും തുടക്കത്തിൽ ഇത്തരം സംശയങ്ങളുണ്ടായിരുന്നുവെന്നും അദ്ദേഹം സൂചിപ്പിച്ചു. തന്റെ ആരോപണങ്ങളിൽ മാധ്യമങ്ങൾ നേരത്തെ വിശ്വാസം പ്രകടിപ്പിച്ചിരുന്നില്ലെന്നും, എന്നാൽ ഇപ്പോൾ ചില മാധ്യമങ്ങൾ വിഷയത്തിൽ സ്വന്തം അന്വേഷണങ്ങൾ നടത്തുകയും റിപ്പോർട്ടുകൾ പ്രസിദ്ധീകരിക്കുകയും ചെയ്യുന്നുണ്ടെന്നും രാഹുൽ പറഞ്ഞു. ഇതോടെ വോട്ട് മോഷണം സംബന്ധിച്ച ആരോപണങ്ങൾക്ക് കൂടുതൽ ശ്രദ്ധ ലഭിക്കുന്നുണ്ടെന്നും അദ്ദേഹം ചൂണ്ടിക്കാട്ടി.
