ആലപ്പുഴ: കരുനാഗപ്പള്ളിയിൽ നിന്ന് കാണാതായ യുവതിയെ സുഹൃത്ത് പ്ലയർകൊണ്ട് തലയ്ക്കടിച്ച് കൊലപ്പെടുത്തിയെന്ന് പോലീസ്. സംഭവവുമായി ബന്ധപ്പെട്ട് യുവതിയുമായി അടുപ്പമുണ്ടായിരുന്ന അമ്പലപ്പുഴ കരൂർ സ്വദേശി ജയചന്ദ്രനെ പോലീസ് അറസ്റ്റ് ചെയ്തു.
ഈ മാസം ആറുമുതലാണ് വിജയലക്ഷ്മി(48) യെ കാണാതായത്. 13ന് ഇവരെ കാണാനില്ലെന്നു കാണിച്ച് ബന്ധുക്കൾ പോലീസിൽ പരാതി നൽകി. ബന്ധുക്കളുടെ പരാതിയെ തുടർന്ന് നടത്തിയ അന്വേഷണത്തിലാണ് കൊലപാതക വിവരം പുറത്തറിയുന്നത്.
അമ്പലപ്പുഴ കാരൂർ സ്വദേശിയാണ് പിടിയിലായ ജയചന്ദ്രൻ. ഇയാളും വിജയലക്ഷ്മിയും തമ്മിൽ സൗഹൃദമുണ്ടായിരുന്നതായി പോലീസ് പറയുന്നു. ഇരുവരും സാമൂഹിക മാധ്യമങ്ങളിലൂടെയാണ് പരിജയപ്പെട്ടത്. വിജയലക്ഷ്മി അമ്പലപ്പുഴ ക്ഷേത്രത്തിൽ തൊഴാൻ എത്തുകയും അമ്പലപ്പുഴ പുറക്കാട് പഞ്ചായത്തിലെ ജയചന്ദ്രന്റെ വീട്ടിൽ പോവുകയും ചെയ്തിരുന്നു. അവിടെവെച്ച് ഇരുവരും തമ്മിൽ വാക്കേറ്റമുണ്ടായതായും തുടർന്ന് ജയചന്ദ്രൻ ഇവരെ കൊന്ന് കുഴിച്ചുമൂടുകയും ചെയ്താകാമെന്നാണ് പോലീസ് നിഗമനം.
ജയചന്ദ്രൻ പ്ലയർ കൊണ്ട് തലയ്ക്കടിച്ചാണ് വിജയലക്ഷ്മിയെ കൊലപ്പെടുത്തിയതെന്നാണ് പോലീസിന്റെ പ്രാഥമിക കണ്ടെത്തൽ. തുടർന്ന് ഇയാളുടെ വീടിന് സമീപത്തെ നിർമാണം നടക്കുന്ന വീടിനുള്ളിൽ മൃതദേഹം കുഴിച്ചിട്ടതായി സംശയിക്കുന്നു.
പിന്നീട് പോലീസിനെ തെറ്റിദ്ധരിപ്പിക്കാനായി എറണാകുളത്ത് എത്തിയ പ്രതി വിജയലക്ഷ്മിയുടെ ഫോൺ കണ്ണൂരിലേക്ക് പോകുന്ന കെഎസ്ആർടിസി ബസിൽ ഇടുകയായിരുന്നു. ഫോൺ കേന്ദ്രീകരിച്ചുള്ള അന്വേഷണവും ദൃക്സാക്ഷി മൊഴിയുമാണ് പ്രതിയെ കുടുക്കാൻ സഹായിച്ചതെന്ന് പോലീസ് വ്യക്തമാക്കി. വിജയലക്ഷ്മി ഭർത്താവുമായി അകന്നുകഴിയുകയായിരുന്നു. ഇതിനിടെ വിജയലക്ഷ്മി പ്രതിയുമായി അടുപ്പത്തിലാവുകയായിരുന്നു.
കരുനാഗപ്പള്ളി പോലീസ് തിങ്കളാഴ്ച വൈകുന്നേരം സ്ഥലത്തെത്തി പ്രാഥമികമായ പരിശോധനകൾ നടത്തിയിരുന്നു. ഫൊറൻസിക് വിദഗ്ധരും പോലീസ് നായ്ക്കളും ചൊവ്വാഴ്ച രാവിലെ സ്ഥലത്തെത്തിയിട്ടുണ്ട്. കരുനാഗപ്പള്ളിയിൽ നിന്നുള്ള പോലീസ് സംഘം ഇയാളുമായി അമ്പലപ്പുഴയിലെത്തി മൃതദേഹത്തിനായി തിരച്ചിൽ നടത്തും.
