പഴനിയില്‍ ലോറിയും വാനും കൂട്ടിയിടിച്ചുണ്ടായ അപകടത്തില്‍ മരണം ഏഴ് ആയി

പാലക്കാട്: പഴനി ആയക്കുടിയില്‍ ലോറിയും വാനും കൂട്ടിയിടിച്ചുണ്ടായ അപകടത്തില്‍ ഏഴ് പേര്‍ മരിച്ചു. കോരുത്തോട് സ്വദേശി ശശി, ഭാര്യ വിജയമ്മ (60), സുരേഷ് (52), ഭാര്യ രേഖ, മകന്‍ മനു (27), സജിനി ബാബു, അഭിജിത് (14) എന്നിവരാണ് മരിച്ചത്. രാത്രി 12 മണിയോടെയായിരുന്നു അപകടം. തമിഴ്‌നാട് റജിസ്‌ട്രേഷനുള്ള ലോറിയും കേരളത്തില്‍ നിന്നുള്ള വാനും കൂട്ടിയിടിച്ചാണ് അപകടം. വാനിലുണ്ടായിരുന്നവരാണു മരിച്ചത്. പരുക്കേറ്റവരെ നാട്ടുകാര്‍ ചേര്‍ന്നാണ് ആശുപത്രിയിലെത്തിച്ചത്. പഴനിയിലേക്കു പോകുംവഴി ഇവര്‍ സഞ്ചരിച്ച വാന്‍ ലോറിയുമായി കൂട്ടിയിടിക്കുകയായിരുന്നു. ഗുരുതരമായി പരുക്കേറ്റ ആദിത്യന്‍ (12) ആശുപത്രിയില്‍ ചികില്‍സയിലാണ്. പഴനിയിലെ സര്‍ക്കാര്‍ ആശുപത്രിയില്‍ നിന്നു പരുക്കേറ്റവരെ മധുരയിലെ ആശുപത്രിയിലേക്കു മാറ്റിയിരുന്നു.