പാരിസ്: പാക്കിസ്ഥാൻ പൈലറ്റുമാർക്കും ക്യാബിൻ ക്രൂ അംഗങ്ങൾക്കും ഇസ്രയേലിലേക്കും തിരിച്ചുമുള്ള വിമാനങ്ങളിൽ പ്രവർത്തിക്കുന്നതിന് വിലക്കേർപ്പെടുത്തി എയർ ഫ്രാൻസ്. ഫ്ലൈദുബായ് സംഭവത്തിന്റെ പശ്ചാത്തലത്തിലാണ് നടപടിയെന്നാണ് സൂചന. ഇസ്രയേലിലേക്കോ അവിടെനിന്ന് തിരിച്ചോ ഉള്ള എയർ ഫ്രാൻസ് വിമാനങ്ങളിൽ പാക്കിസ്ഥാൻ ജീവനക്കാരെ അനുവദിക്കില്ല.
ഇസ്രയേലുമായി നയതന്ത്രബന്ധമില്ലാത്ത രാജ്യങ്ങളിലെ പൗരന്മാരെ വിമാനങ്ങളിൽ ജീവനക്കാരായി നിയോഗിക്കുന്നതിന് ഏർപ്പെടുത്തിയ നിയന്ത്രണങ്ങൾ അനുസരിച്ചാണ് നടപടിയെന്ന് എയർ ഫ്രാൻസ് വൃത്തങ്ങൾ അറിയിച്ചു. യുഎസ് വിമാനക്കമ്പനിയായ യുണൈറ്റഡ് എയർലൈൻസും ചെക്ക് വിമാനക്കമ്പനിയായ സ്മാർട് വിങ്സും സമാനമായ നിയന്ത്രണങ്ങൾ ഏർപ്പെടുത്താൻ ഒരുങ്ങുന്നതായും റിപ്പോർട്ടുകളുണ്ട്.
ഇസ്രയേൽ നിയന്ത്രണങ്ങൾ കടുപ്പിച്ചതോടെ ഇന്തൊനീഷ്യൻ പൈലറ്റ് നിയന്ത്രിച്ചിരുന്ന എത്യോപ്യൻ വിമാനം ചൊവ്വാഴ്ച തിരിച്ചുപോകേണ്ടിവന്നു. യാത്ര തുടങ്ങി ഒരു മണിക്കൂറിനുശേഷമാണ് ഇസ്രയേലിന്റെ ഉത്തരവ് ലഭിച്ചതെന്ന് ജറുസലം പോസ്റ്റ് റിപ്പോർട്ട് ചെയ്തു. തുടർന്ന് വിമാനം ആഡിസ് ആബബയിലേക്ക് മടങ്ങി. അവിടെ പൈലറ്റിനെ മാറ്റിയശേഷം വിമാനം ടെൽ അവീവിലേക്ക് തിരികെയെത്തുകയായിരുന്നു. ഇന്തൊനീഷ്യയ്ക്കും ഇസ്രയേലിനും നയതന്ത്രബന്ധമില്ല.
പാക്കിസ്ഥാൻ, ഇറാൻ, ഒമാൻ, സൗദി അറേബ്യ, അൾജീരിയ, ടുണീഷ്യ, ബംഗ്ലദേശ്, അഫ്ഗാനിസ്ഥാൻ, ഇറാഖ്, ലെബനൻ, നൈജർ എന്നിവയുൾപ്പെടെ 31 മുസ്‌ലിം ഭൂരിപക്ഷ രാജ്യങ്ങളിലെ പൗരന്മാരെ നിയന്ത്രണങ്ങൾ ബാധിക്കുമെന്നാണ് വിവരം.
