തൃശൂർ; വടക്കേ സ്റ്റാൻഡിൽ വനിതാ പോലീസിനേയും മറ്റൊരു പോലീസുകാരെയും ആക്രമിച്ച കേസിലെ പ്രതി അറസ്റ്റിൽ. വരന്തരപ്പിള്ളി സ്വദേശി ഹരിഗോവിന്ദിനെയാണ് (25) അറസ്റ്റ് ചെയ്തത്. ഇന്നലെ ബസുകാരുമായി തർക്കത്തിലേർപ്പെട്ട ഹരിഗോവിന്ദനെ പിടിച്ചുമാറ്റുന്നതിനിടെയാണ് പോലീസുകാരന് മർദനമേറ്റത്. ട്രാഫിക് ഡ്യൂട്ടിയിലായിരുന്ന പ്രവീൺ എന്ന പോലീസുകാരനാണ് മർദനമേറ്റത്. ഈ ദൃശ്യം മൊബൈലിൽ പകർത്തിയ വനിത സിവിൽ പോലീസ് ഓഫിസറെയും പ്രതി ആക്രമിച്ചിരുന്നു. വനിതാ പോലീസിന്റെ കരണത്തിനിട്ട് അടിക്കുകയായിരുന്നു പ്രതി. കൂടാതെ പോലീസുകാരന്റെ കഴുത്തിൽ തൂക്കിയെടുത്ത് ഫുട്പാത്തിലൂടെ വട്ടം കറക്കുകയും ചെയ്തു.
ആക്രമണത്തിൽ തലയ്ക്ക് പരുക്കേറ്റ പ്രവീണിനെ ജില്ലാ ആശുപത്രിയിൽ പ്രവേശിപ്പിച്ചു. കസ്റ്റഡിയിലെടുത്ത പ്രതിയെ സ്റ്റേഷനിൽ എത്തിച്ചപ്പോഴും ഇയാൾ അക്രമാസക്തനായി. പിന്നീട് ചോദ്യം ചെയ്തപ്പോൾ പ്രതി പോലീസിനു മുന്നിൽ പൊട്ടിക്കരഞ്ഞു. ഇതോടെ മുൻപ് ഇതായിരുന്നില്ലല്ലോ നിന്റെ പ്രതികരണമെന്നായിരുന്നു പോലീസിന്റെ ചോദ്യം. അതേസമയം യുവാവിന്റെ അക്രമത്തിന്റെയും അറസ്റ്റിന്റെയും കരച്ചിലിന്റെയും വീഡിയോ കേരള പൊലീസ് സമൂഹമാധ്യമത്തിൽ പങ്കുവച്ചു. ‘കരയാതെ കണ്ണുറങ്ങ്’ എന്ന ഗാനത്തോടൊപ്പമാണ് പ്രതിയുടെ വീഡിയോ പങ്കുവച്ചത്. പ്രതിക്കെതിരെ വധശ്രമത്തിന് കേസെടുത്തു.
മിഠായി തൊണ്ടയിൽ കുടുങ്ങി; ആശുപത്രിയിലെത്തിച്ചെങ്കിലും രക്ഷിക്കാനായില്ല, ഒന്നരവയസുകാരന് ദാരുണാന്ത്യം