കൊച്ചി: സംസ്ഥാനത്ത് സ്വർണവിലയിൽ വീണ്ടും വൻ ഇടിവ്. വ്യാഴാഴ്ച പവന് 1,880 രൂപ കുറഞ്ഞ് 95,840 രൂപയിലെത്തി. ഗ്രാമിന് 235 രൂപ കുറഞ്ഞ് 11,980 രൂപയായി. ബുധനാഴ്ച പവന് 2,040 രൂപയുടെ ഇടിവ് രേഖപ്പെടുത്തിയിരുന്നു. രണ്ടു ദിവസംകൊണ്ട് പവന് കുറഞ്ഞത് 3,920 രൂപയാണ്.
രാവിലെ 9.20ന് കേരള ഗോൾഡ് ആൻഡ് സിൽവർ മർച്ചന്റ്സ് അസോസിയേഷൻ പുറത്തുവിട്ട കണക്കുപ്രകാരം 22 കാരറ്റ് സ്വർണത്തിന് ഗ്രാമിന് 235 രൂപ കുറഞ്ഞ് 11,980 രൂപയായി. ഇതോടെ ഒരു പവൻ സ്വർണത്തിന്റെ വില 95,840 രൂപയിലെത്തി. 18 കാരറ്റ് സ്വർണത്തിന് ഗ്രാമിന് 195 രൂപ കുറഞ്ഞ് 9,805 രൂപയും 14 കാരറ്റിന് 150 രൂപ കുറഞ്ഞ് 7,675 രൂപയും ഒൻപത് കാരറ്റിന് 95 രൂപ കുറഞ്ഞ് 4,950 രൂപയുമായി. വെള്ളിവിലയിൽ മാറ്റമില്ല. ഒരു ഗ്രാം വെള്ളിക്ക് 180 രൂപയും 10 ഗ്രാമിന് 1,800 രൂപയുമാണ് ഇന്നത്തെ നിരക്ക്.
കഴിഞ്ഞ ഏതാനും ദിവസങ്ങളായി സ്വർണവില തുടർച്ചയായി താഴുന്ന പ്രവണതയാണ് വിപണിയിൽ. ജനുവരി 29-ന് രാവിലെ രേഖപ്പെടുത്തിയ പവന് 1,31,160 രൂപയാണ് ഇതുവരെയുള്ള റെക്കോഡ് നിരക്ക്. ഇതുമായി താരതമ്യം ചെയ്യുമ്പോൾ പത്തുമാസത്തിനിടെ പവന് 35,320 രൂപയുടെ കുറവുണ്ടായി.
പണപ്പെരുപ്പം നിയന്ത്രിക്കുന്നതിന്റെ ഭാഗമായി യു.എസ്. ഫെഡറൽ റിസർവ് അടിസ്ഥാന പലിശനിരക്കുകൾ ഉയർത്തിയേക്കുമെന്ന സൂചനകളാണ് സ്വർണവിലയ്ക്ക് തിരിച്ചടിയായത്. അന്താരാഷ്ട്ര വിപണിയിൽ ഒരു ട്രോയ് ഔൺസ് (31.1 ഗ്രാം) തനിത്തങ്കത്തിന്റെ വില 3,725 ഡോളറിലേക്ക് താഴ്ന്നു. ആഗോള വിപണിയിലെ സമ്മർദം തുടർന്നാൽ സ്വർണവിലയിൽ ഇനിയും ഇടിവുണ്ടായേക്കുമെന്നാണ് വിലയിരുത്തൽ.
ജനുവരി അവസാനവാരത്തിൽ അന്താരാഷ്ട്ര വിപണിയിൽ സ്വർണവില ഔൺസിന് 5,595 ഡോളറിനടുത്തെത്തിയിരുന്നു. അവിടെനിന്ന് വലിയ ഇടിവാണ് പിന്നീട് രേഖപ്പെടുത്തിയത്. എന്നാൽ ആഗോള വിപണിയിലെ വിലയിടിവിന്റെ പ്രതിഫലനം ആഭ്യന്തര വിപണിയിൽ പൂർണമായി ഉണ്ടായിട്ടില്ല. ഇറക്കുമതിത്തീരുവയിലുണ്ടായ വർധനയാണ് ഇതിന് പ്രധാന കാരണമായി ചൂണ്ടിക്കാട്ടുന്നത്.