പനാജി: മഹാരാഷ്ട്രയിലെ ഖോപോളിയിൽ മലയാളി വയോധികയെ ഫ്ലാറ്റിനുള്ളിൽ കൊലപ്പെടുത്തിയ കേസിൽ പ്രതി പിടിയിൽ. നേപ്പാൾ സ്വദേശിയായ യഷ് താപ്പേയെ ഗോവയിൽനിന്നാണ് പോലീസ് കസ്റ്റഡിയിലെടുത്തത്. മോഷണശ്രമത്തിനിടെയാണ് 71-കാരിയായ മഹേശ്വരിയെ കൊലപ്പെടുത്തിയതെന്നാണ് പോലീസിന്റെ കണ്ടെത്തൽ. പ്രതി ലഹരിക്ക് അടിമയാണെന്നും ക്രിമിനൽ പശ്ചാത്തലമുള്ളയാളാണെന്നും പോലീസ് അറിയിച്ചു.
കഴിഞ്ഞ ബുധനാഴ്ചയാണ് ആലപ്പുഴ സ്വദേശിനിയായ മഹേശ്വരിയെ ഖോപോളിയിലെ ഫ്ലാറ്റിൽ മരിച്ചനിലയിൽ കണ്ടെത്തിയത്. ഫോണിൽ ബന്ധപ്പെടാൻ ശ്രമിച്ചിട്ടും കിട്ടാതായതോടെ ബന്ധുക്കൾ പോലീസിനെ വിവരമറിയിക്കുകയായിരുന്നു. തുടർന്ന് ഫ്ലാറ്റിലെത്തിയപ്പോൾ പുറത്ത് പൂട്ടിയ നിലയിലായിരുന്നു. പരിശോധനയിൽ കിടപ്പുമുറിയിൽനിന്നാണ് മൃതദേഹം കണ്ടെത്തിയത്.
തുടർന്ന് നടത്തിയ അന്വേഷണത്തിലാണ് യഷ് താപ്പേയെക്കുറിച്ച് പോലീസിന് സൂചന ലഭിച്ചത്. മഹേശ്വരി താമസിച്ചിരുന്ന ഫ്ലാറ്റിന് സമീപത്തായിരുന്നു പ്രതിയും കുടുംബവും താമസിച്ചിരുന്നത്. സാമ്പത്തിക ബാധ്യതകൾ തീർക്കാനാണ് മോഷണം നടത്തിയതെന്ന് പ്രതി പോലീസിനോട് സമ്മതിച്ചതായാണ് വിവരം.