തൃശ്ശൂർ: ഇ-20 പെട്രോളിനെച്ചൊല്ലിയുള്ള വിവാദങ്ങൾ സയൻസ് അറിയാത്ത പൊട്ടന്മാരാണ് സൃഷ്ടിക്കുന്നതെന്ന പരിഹാസവുമായി കേന്ദ്ര പെട്രോളിയം വകുപ്പ് സഹമന്ത്രി സുരേഷ് ഗോപി. ഇ-20 ഇന്ധനവുമായി ബന്ധപ്പെട്ട് ഉയരുന്ന ആശങ്കകളെയും ചോദ്യങ്ങളെയും തള്ളിയ അദ്ദേഹം, ചില ദുഷ്ട രാഷ്ട്രീയശക്തികൾ വിഷയം രാഷ്ട്രീയ നേട്ടത്തിനായി ഉപയോഗിക്കുകയാണെന്നും ആരോപിച്ചു.
രാജ്യത്ത് ഒരിടത്തും പെട്രോളിൽ 20 ശതമാനത്തിലധികം എഥനോൾ കലർത്തുന്നില്ലെന്ന് സുരേഷ് ഗോപി പറഞ്ഞു. ചില മഹാന്മാർ കന്നാസിൽ പെട്രോൾ കൊണ്ടുപോയി സ്വയം മിക്സ് ചെയ്തതാണോ എന്നറിയില്ല. അങ്ങനെയാണെങ്കിൽ വിഷയത്തിൽ സിബിഐ അന്വേഷണം വരുമെന്നും പിന്നീട് ഇക്കൂട്ടർ സിബിഐക്കെതിരേ തിരിയുമെന്നും അദ്ദേഹം പരിഹസിച്ചു.
പെട്രോളിൽ എഥനോൾ കലർത്തുന്നതുമായി ബന്ധപ്പെട്ട് ഔദ്യോഗികമായി പരാതികളൊന്നും ലഭിച്ചിട്ടില്ലെന്നും വാഹനങ്ങൾക്ക് കേടുപാടുകൾ സംഭവിച്ചതായി ചൂണ്ടിക്കാട്ടി ഒരു ഇൻഷുറൻസ് കമ്പനിയും ക്ലെയിം നൽകിയിട്ടില്ലെന്നും സുരേഷ് ഗോപി അവകാശപ്പെട്ടു.