തിരുവനന്തപുരം; സ്പാകൾ കേന്ദ്രീകരിച്ചു ലൈംഗികചൂഷണങ്ങൾ വർധിക്കുന്നുവെന്ന പരാതികൾ വ്യാപകമാകുന്ന സാഹചര്യത്തിൽ പുതിയ മാർഗനിർദേശങ്ങൾ പുരത്തിറക്കി തിരുവനന്തപുരം കോർപറേഷൻ. സ്പാ, മസാജ് സെന്ററുകൾ, വെൽനെസ് സെന്ററുകളിലെ ട്രീറ്റ്മെന്റ് മുറികൾ എന്നിവ അകത്തു നിന്ന് കുറ്റി ഇടാനോ പുറത്തു നിന്ന് പൂട്ടാനോ കഴിയുന്ന തരത്തിൽ ആയിരിക്കരുതെന്ന് മാർഗ നിർദേശത്തിൽ പറയുന്നു.
ട്രീറ്റ്മെന്റ് മുറികളിൽ സിസിടിവി ക്യാമറകൾ പാടില്ല. സ്വീകരണ സ്ഥലം, കാത്തിരിപ്പ് സ്ഥലം, ഇടനാഴികൾ, ചികിത്സ-തെറാപ്പി മുറികളിലേക്കുള്ള പ്രവേശന കവാടങ്ങൾ എന്നിവിടങ്ങളിൽ ക്യാമറകൾ സ്ഥാപിക്കണമെന്നും ദൃശ്യങ്ങൾ 30 ദിവസം സൂക്ഷിക്കണമെന്നും അനധികൃത സ്പാ, മസാജ് സെന്ററുകളുടെ പ്രവർത്തനം തടയുന്നതിനായി തയാറാക്കിയ നിയമാവലിയിൽ ശുപാർശയുണ്ട്. ഉടമ ഉൾപ്പെടെ എല്ലാ ജീവനക്കാരും ബന്ധപ്പെട്ട പൊലീസ് സ്റ്റേഷനിൽ നിന്നുള്ള വാർഷിക പോലീസ് ക്ലിയറൻസ് ലൈസൻസിനായി ഹാജരാക്കണം.
ഇതര സംസ്ഥാന ജീവനക്കാർ അതത് സ്ഥലത്തെ ജില്ലാ പൊലീസ് മേധാവിയുടെ ക്ലിയറൻസ് സർട്ടിഫിക്കറ്റ് ഹാജരാക്കണം. പൂർണമായ മേൽവിലാസം, ഫോൺ നമ്പർ, തിരിച്ചറിയൽ രേഖ ഉൾപ്പെടെ ഇടപാടുകാരുടെ വിവരങ്ങൾ സ്പാ സെന്ററുകളിൽ സൂക്ഷിക്കണം. മദ്യം, ലഹരി വസ്തുക്കൾ, മരുന്നുകൾ എന്നിവയുടെ വിൽപനയോ ഉപയോഗമോ പാടില്ല. പ്രായപൂർത്തിയാകാത്തവരെ ജീവനക്കാരായി നിയോഗിക്കരുതെന്നും നിയമാവലിയിൽ പറയുന്നു.