ചിറ്റൂർ: ഏതാനും ആഴ്ചകൾക്കു മുൻപാണ് ആ കുടുംബത്തിന്റെ അത്താണി അവർക്ക് നഷ്ടമായത്. ഒരു 17 കാരന്റെ ഡ്രൈവിങ് മോഹത്തിനു മുന്നിൽ, ടയറുകൾക്കിടയിൽ ഞെരിഞ്ഞമർന്ന് അവർക്ക് നഷ്ടമായത്, ഒരു അച്ഛനേയാണ്, ഒരു ഭർത്താവിനെയാണ്. എന്നാൽ അവർക്ക് മുന്നോട്ട് ജീവിതം തുഴഞ്ഞേ പറ്റു… അതിനായി കണ്ണീരുണങ്ങും മുൻപേ ബാലകൃഷ്ണന്റെ തട്ടുകടയിൽ വീണ്ടും അടുപ്പെരിഞ്ഞു. ജയബാലകൃഷ്ണൻ നാട്ടുകാർക്കു മുൻപിൽ സ്നേഹത്തോടെ വിളമ്പിയ ദോശയും ചമ്മന്തിയും ഓംലെറ്റുമെല്ലാം ആവശ്യക്കാർക്കായി വിളമ്പി ഭാര്യയും മകളും. കണ്ടെയ്നർ റോഡിൽ പതിനേഴുകാരൻ ഓടിച്ച കാർ ഇടിച്ചു മരിച്ച ജയബാലകൃഷ്ണന്റെ തട്ടുകടയാണ് കഴിഞ്ഞദിവസം മുതൽ ഭാര്യ ബിന്ദുവും മകൾ ഭദ്രകീർത്തിയും ചേർന്നു തുറന്നത്.
ജയബാലകൃഷ്ണന്റെ ചിത്രത്തിനു താഴെ തിരി തെളിച്ചാണ് കട വീണ്ടും തുടങ്ങിയത്. ജയബാലകൃഷ്ണന്റെ മരണത്തോടെ കുടുംബത്തിന്റെ ജീവിതമാർഗവും ഏറെ പ്രതിസന്ധിയിലായിരുന്നു. ഇതോടെയാണ് തട്ടുകട വീണ്ടും തുറക്കാൻ കുടുംബം തീരുമാനിച്ചത്. ഹൈദരാബാദിലെ ജോലി തൽക്കാലത്തേക്ക് ഉപേക്ഷിച്ചാണ് ഭദ്രകീർത്തി കടയിൽ നിൽക്കുന്നത്. കേസിന്റെ കാര്യങ്ങൾ കൃത്യമായി നോക്കുന്നുണ്ടെന്നും എതിർ ഭാഗത്ത് ജഡ്ജിയായതിനാൽ പ്ലാനിങ്ങോടു കൂടിയാണ് കേസ് നടത്തുന്നതെന്ന് ഇതിനിടയിൽ ഭദ്ര കീർത്തി പറഞ്ഞു.