ബല്ലിയ: യുവതിയുടെ ബ്ലാക്ക്‌മെയിലിങ്ങിനെത്തുടർന്ന് ഉത്തർപ്രദേശിൽ 28കാരനായ പൊലീസ് സബ് ഇൻസ്പെക്ടർ ജീവനൊടുക്കി. ബല്ലിയ ജില്ലയിലെ റെയിൽവേ പാളത്തിലാണ് എസ്‌ഐയുടെ മൃതദേഹം കണ്ടെത്തിയത്. ചിത്ബഡ്ഗാവ് പൊലീസ് സ്റ്റേഷനിൽ ജോലി ചെയ്തിരുന്ന സന്ദീപ് കുമാറാണ് (28) മരിച്ചത്. സംഭവത്തിൽ അന്വേഷണം പുരോഗമിക്കുകയാണെന്ന് പൊലീസ് അറിയിച്ചു.
ശനിയാഴ്ച രാത്രി ഏഴ് മണിക്കും എട്ട് മണിക്കും ഇടയിലാണ് സംഭവത്തെക്കുറിച്ച് പൊലീസിന് വിവരം ലഭിച്ചത്. റെയിൽവേ ട്രാക്കിൽ കിടന്ന് ഒരാൾ ജീവനൊടുക്കിയെന്ന വിവരം അടുത്ത റെയിൽവേ സ്റ്റേഷനിലെത്തിയ ലോക്കോ പൈലറ്റ് നൽകിയ എംആർഒ റിപ്പോർട്ടിലൂടെയാണ് അധികൃതർ അറിഞ്ഞത്. തുടർന്ന് സ്ഥലത്തെത്തിയ പൊലീസ് സംഘം സമീപത്ത് ഒരു ബുള്ളറ്റ് മോട്ടോർസൈക്കിൾ കണ്ടെത്തി.
വിശദമായ അന്വേഷണത്തിനൊടുവിലാണ് മരിച്ചത് സന്ദീപ് കുമാറാണെന്ന് തിരിച്ചറിഞ്ഞത്. സന്ത് കബീർ നഗർ സ്വദേശിയായ അദ്ദേഹം കഴിഞ്ഞ 11 മാസമായി ചിത്ബഡ്ഗാവ് പൊലീസ് സ്റ്റേഷനിൽ സേവനമനുഷ്ഠിച്ചുവരികയായിരുന്നു.
സിക്കന്ദർപുർ പൊലീസ് സ്റ്റേഷൻ പരിധിയിൽ താമസിക്കുന്ന യുവതിയുമായി സന്ദീപ് പ്രണയബന്ധത്തിലായിരുന്നുവെന്ന് ജില്ലാ പൊലീസ് മേധാവി ഇറാജ് രാജ പറഞ്ഞു. തന്നെ വിവാഹം കഴിക്കണമെന്ന് ആവശ്യപ്പെട്ട് യുവതി സന്ദീപിനെ സമ്മർദത്തിലാക്കിയിരുന്നതായും ബ്ലാക്ക്‌മെയിൽ ചെയ്തിരുന്നതായും ആരോപണമുണ്ട്.
രണ്ടുവർഷം മുമ്പ് ഇതേ യുവതി മറ്റൊരു പൊലീസ് ഉദ്യോഗസ്ഥനെതിരെ ബലാത്സംഗക്കേസ് നൽകിയിരുന്നതായും എസ്പി വെളിപ്പെടുത്തി. സംഭവത്തിൽ യുവതിയുടെ പങ്കും ബ്ലാക്ക്‌മെയിലിങ് ആരോപണങ്ങളും പൊലീസ് പരിശോധിച്ചുവരികയാണ്. മരിച്ച ഉദ്യോഗസ്ഥന്റെ കുടുംബാംഗങ്ങളെ വിവരം അറിയിച്ചിട്ടുണ്ട്. മൃതദേഹം പോസ്റ്റ്‌മോർട്ടത്തിനായി അയക്കുമെന്നും സംഭവത്തിൽ ആവശ്യമായ നിയമനടപടികൾ സ്വീകരിച്ചുവരികയാണെന്നും പൊലീസ് അറിയിച്ചു.
